Qeveria e re e Kosovës, Kurti dhe Osmani nisin takimet me partitë politike
Kreu i Lëvizjes Vetëvendosje, Albin Kurti dhe ushtruesja e detyrës së Presidentit në Kosovë, Vjosa Osmani nisin sot takimet me partitë politike pas certifikimit të rezultatit të zgjedhjeve të 14 shkurtit. RTK raporton se Kurti dhe Osmani sot gjatë ditës do të takohen me kreun e PDK-së dhe atë të AAK-së.
“Katër ditë më parë në selinë e LDK-së, AAK-së, dhe PDK-së kanë dërguar nga një letër, u.d e presidentit, Vjosa Osmani dhe kreu i LVV-së, Albin Kurti. Kurti dhe Osmani të dalë të parët nga zgjedhjet e 14 shkurtit kanë kërkuar takim me shefin e LDK-së, atë PDK-së dhe AAK-së në mënyrë që të dakordohen për formimin e institucioneve të reja.
Kreu i LVV-së e prijësja e Listës “GUXO” kanë kërkuar nga kreu në detyrë i PDK-së, Enver Hoxhaj që të takohen sot në ora 11:00. Hoxhaj dhe PDK-ja kanë pranuar ftesën e rrjedhimisht ky takim do të mbahet në këtë orë sot në Kuvendin e Kosovës. Një takim dyshja do ta mbajë edhe me Ramush Haradinajn, kreun e AAK-së. Në konsultë për formimin e institucioneve të reja, Haradinaj, Kurti e Osmani do të takohen sot në ora 13:30.
Një orë e gjysmë më vonë, Haradinaj ka ftuar mbledhje të kryesisë së partisë të cilën ai e udhëheq. Megjithatë, një takim me Osmanin e Kurtin nuk do ta mbajnë në LDK. Kryetari i zgjedhur i këtij subjekti, Lumir Abdixhiku nuk është shprehur i gatshëm që të shihet me liderin e LVV-së dhe Osmanin në ditën e parë të punës si kryetar i Lidhjes Demokratike. Takimi që ishte thirrur për sot në orën 12:30, sipas Abdixhikut mund të mbahet të premten” shkruan RTK.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.