Qeveria, gati platformën e-biznesi – Përmirësim i konkurrueshmërisë dhe grante mbi 4 milionë euro për daljen nga kriza
Qeveria do të ndërmarrë një iniciativë për zhvillimin e platformës e-biznesi. Masa është përcaktuar si prioritare në dokumentin e programit të reformave ekonomike 2022-2024, ky synohet dixhitalizimi i sipërmarrjeve, kryesisht biznesve të Vogla dhe të Mesme (SME) në vend, me qëllim zbutjen e ndikimit negativ ekonomik të COVID-19.Iniciativa për zhvillimin e e-biznesit, synon përmirësimin e konkurrueshmërisë dhe aksesit të SME-ve në tregje duke i ndihmuar ato të adoptojnë zgjidhje dixhitale për tregtinë elektronike dhe biznesin elektronik; Forcimi i aftësive dixhitale të Ndërmarrjeve të Vogla dhe të Mesme; Sigurimin e një mjedisi të përshtatshëm dhe rregullator biznesi për tregtinë elektronike për të mbështetur sipërmarrësit dhe SME-të duke përdorur sinergji me masat e parashikuara në Axhendën e re Dixhitale.
Sipas dokumentit, rreth 98% e SME-ve shqiptare janë të lidhura me internetin, ose thënë ndryshe kanë të paktën një punonjës që përdor internetin për qëllime biznesi. Gjithashtu, projekti ProSEED që nga shkurti i vitit 2021 po zbaton Instrumentin Këshillimor që ofron shërbime trajnimi dhe këshillimore për ndermarrjet mikro, te mesme dhe te vogla (MSME-të) me mundësinë e marrjes së granteve të vogla . Instrumenti këshillues i titulluar “CoSolve 19”, ka si qëllimi i këtij të mbështesë Ndërmarrjet Mikro, të Vogla dhe të Mesme, të prekura rëndë nga pasojat e krizës COVID-19 në Shqipëri, që të ruajnë punësimin dhe të përshtatin aktivitetin e tyre të biznesit sipas situatës së re.
Projekti do të zbatohet për periudhën 2021-2022 dhe numri i përgjithshëm i Ndërmarrjeve Mikro, të Vogla dhe Mesme përfituese është 900 të cilat do të marrin shërbime këshillimore. Vëllimi i përgjithshëm përfundimtar i CoSolve-19 është 4,35 Milionë EUR dhe ndarja e fondeve totale është 40% këshilla dhe 60% grante për të gjithë sektorët. Masat mbështetëse për sipërmarrjet mikro, të vogla dhe të mesme nga bujqësia, turizmi, tregtia me pakicë dhe prodhimi do t’u mundësojnë atyre të kapërcejnë me sukses krizën COVID-19, të ruajnë dhe në afat të mesëm të rrisin punësimin si dhe të prezantojnë zgjidhje dhe mjete të reja biznesi dixhitale.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.