Qeveria jep me qira 1 euro 200 ha tokë – Investimi strategjik, mundëson hapjen e 300 vendeve të reja pune në Fier dhe Divjakë

Këshilli i Ministrave ka vendosur për transferimin e rreth 200 hektarëve tokë “arë” në Fondin e Pasurive të Paluajtshme për mbështetjen e projektit investues strategjik “Albpanel.”

Ky projekt parashikon realizimin e një impianti për ndërtimin e fabrikës së prodhimit të paneleve MDE, duke përdorur si lëndë të parë kallamin dhe çdo mbetje me përbërje fibroze. Investimi kap vlerën e 15 milionë eurove dhe do të krijojë 300 vende pune. Projekti hyri në listën e investimeve strategjike në fund të vitit 2016.

Janë rreth 10 parcela në njësinë administrative Libofshë, të Bashkisë Fier dhe 16 parcela në njësinë administrative Remas, Bashkia Divjakë të cilat do të jepen me qira me vlerën simbolike 1 euro për 35 vitet në vijim.

Afati i përdorimit është përcaktuar edhe data e hyrjes së këtij vendimi në fuqi, që është edhe dita e sotme.

Investitori në fjalë ka të drejtë përdorimin e tokës shtetërore, ku do të ngrihen fermat e kallamave, ndërsa fabrika do të ndërtohet në Libofshë.

Bashkia e Fierit dhe ajo e Divjakës do të ndërmarrin nisjen e procedurave për vënien e sipërfaqeve të nevojshme në dispozicion të këtij projekti investimi, procedurë e cila duhet të realizohet brenda 3 muajve.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.