Qeveria, marrëveshje për vaksinën kineze – Do furnizohemi nga distributori turk, detajet e dokumentit do jenë sekrete 

Qeveria shqiptare ka nënshkruar marrëveshje me distributorin turk të autorizuar për vaksinën e COVID-19 Coronavac, të krijuar nga kompania Sinovac dhe prodhuar në Kinë. Akti Normativ për miratimin e marrëveshjes është publikuar në Fletoren Zyrtare, ndërkohë që ngjashëm me kontratën e nënshkruar me kompaninë Pfizer.

Marrëveshja për furnizimin për shkak të sekretit tregtar dhe kërkesës së shprehur në marrëveshje nga distributor turk “Keymen Ilaç Sanayi ve ticaret”, nuk do të publikohet në asnjë website të institucioneve apo në Fletoren Zyrtare. Ndërkohë që, të gjitha institucionet e përfshira në dhënien e mendimit, të miratimit apo që janë pjesë e procesit kanë detyrimin të mos bëjnë publike marrëveshjen që i bashkëlidhet akti normativ apo pjesë të saj. Efektet financiare, që rrjedhin nga kjo marrëveshje do të përballohen nga fondi rezervë i buxhetit të shtetit për vitin 2021.

Nënshkrimi i kësaj marrëveshjeje vjen vetëm pak ditë, pasi  qeveria shqiptare i hapi rrugën përdorimit të vaksinave anticovid-19, që nuk janë të certifikuara nga agjencia amerikane dhe europiane e barnave. Ky ishte një ndryshim i fortë në qëndrimin e qeverisë shqiptare, që kishte shprehur vendosmërinë  për të mos lejuar përdorimin e këtyre vaksinave. Aktualisht, në vendin tonë kanë mbërritur  në total 90 325 doza, nga të cilat: 38 400 Astrazeneca,  10 mijë Sputnik V dhe 41 925 Pfizer.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.