Qeveria njofton shërbimin e ri: “Dokumentet e pronës mund të merren tashmë nga shtëpia për 3-5 minuta”
Dokumentet e pronës tashmë mund të merren online në portalin qeveritar e-albania, ka njoftuar kryeministri Edi Rama së bashku me kreun e Kadastrës Artan Lame.
Ky shërbim i ri është pjesë e procesit të transformimit dixhital që po kalon Shqipëria ka njoftuar kryeministri.
“Do të mjaftojë tashmë një klik në https://e-albania.al dhe kadastra shtetërore do të vijë tek ju, pa ndërmjetës e pa radhë. Sistemi sapo është “ndezur” dhe lutja ime për të gjithë është që në këto dy javë të para testimi, pak durim nëse hasni në vështirësi gjatë marrjes së shërbimit.
Pagesat për këtë shërbim do të bëhen online nëpërmjet llogarive bankare dhe kryeministri ka njoftuar se po finalizohen marrëveshjet me bankat e nivelit të dytë, ndërkohë që ka edhe zgjidhje për ata që nuk mund të kryejnë pagesa në këtë mënyrë:
Siç do ta shihni edhe pagesat e shërbimeve të kadastrës do të mund t’i bëni online, përmes llogarisë suaj bankare, ndërkohë që po finalizohen marrëveshjet me të gjitha bankat e nivelit të dytë në vendin tonë.
Për ata që nuk kanë kartë krediti apo debiti, mandat pagesa gjenerohet nga https://e-albania.al dhe qytetari e bën pagesën në bankë dhe e ngarkon në aplikim – pa radhë, pa vonesë, pa ryshfet.
Ndërsa, kreu i Kadastrës Artan Lame shpjegon se me këtë shërbim zhduket kontakti fizik nëpër sportele. Më tej ai ka shpjeguar se përgjigja do jepet brenda 3-5 minutave për 1 milion e 700 mijë persona në sistem, ndërsa të tjerët që nuk janë pjesë e tij do të kalojnë në verifikimin e Drejtorive Vendore:
“Qytetari me këtë shërbim, ka tre elementë. E para ku e merr shërbimin, e dytë kur kohë do t’i duhet për ta marrë shërbimin dhe e treta si e merr shërbimin.
Ku-në e zgjidhëm me aplikimin online. Qytetari nuk ka më punë me sportelet tona.
Kjo, është ajo që po bëjmë sot. Aplikimi po bëhet online dhe nëse paguan me kartë ose direkt me telefon ose bar kompjuteri, shërbimi i kthehet mbrapsht përgjigja brenda 5 minuta.
Si-ja është të jemi të ndërgjegjshëm që ne sot po lancojmë në rreth 4 mln e 100 mijë banorë që ka Shqipëria rreth 1 milion e 700 mijë të tyre i nënshtrohen këtij sistemi. Pra për këto 1 mln e 700 mijë prona shërbimi merret për 3-5 minuta pas pagesës.
Edhe për pronat e tjera, por që nuk janë në sistem përgjigjen do ta marrim po online, por jo për 3 minuta, por pasi ta përpunojnë drejtoritë vendore. Me këtë e zhdukim kontaktin me publikun”, tha Artan Lame.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.