Qeveria pagoi 352 milion lekë për check-up – Shifrat zyrtare/ U kryen 101 426 kontrolle, buxheti i shtetit pagoi për shërbime të pakryera
Pavarësisht reduktimit të buxhetit, për vitin 2020 u paguan 352 mln lekë për kontrollin shëndetësor bazë apo siç njihet ndryshe check-up. Sipas të dhënave zyrtare, Ministria e Shëndetësisë dhe Mbrojtjes Sociale raporton realizimin e 101,426 kontrolleve check up gjatë vitit që lamë pas, ndërkohë që sipas të dhënave të përpunuara nga TV SCAN rezulton se kompania koncesionare është paguar edhe për kontrolle që nuk janë kryer.
Kjo pasi sipas qeverisë, një check-up kryhet nga koncesionari me 1 537 lekë, çka do të thotë se në total kosto për kontrollet e raportuar shkon në 155.89 mln lekë. Diferenca prej 194.11 mln lekë e paguar nga buxheti i shtetit për koncesionarin, duket se nxjerr në pah konstatimet e bëra më herët nga Kontroli i Lartë i Shtetit për mbrojtjen që iu sigurojnë kushtet e kontratave kompanive koncesionare, që përfitojnë para’ publike për shërbime të pakryera.
Kjo pasi, nga auditimi mbi monitorimin e kontratës së check-up rezultoi se pagesat e marra tepër nga koncesionari, për punën e pa kryer për vitet 2015, 2016, 2017 dhe 2018, shkojnë në 801 milion lekë. Sipas ministrisë së Shëndetësisë, duke filluar nga gjysma e dytë e muajit mars të vitit të kaluar ky shërbim u ndërpre përkohësisht, rinisi në fund të muajit shtator dhe me pas u ripezullua për shkak të situatës së krijuar nga COVID-19. Ndërkohë që ky dikaster pranon se situata e krijuar nga pandemia ka sjellë nevojën e rishikimit të treguesve sasiorë të performancës në disa nga shërbimet në programin e shërbimit parësor, ku përfshihet edhe kontrolli shëndetësor bazë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.