Qeveria “refuzon” LSI – Nuk merr në konsideratë tre amendamentet e propozuara
Pas mbledhjes së grupit parlamentar të Lëvizjes Socialiste për Integrim, deputeti Përparim Spahiu, në një dalje për mediat, është shprehur se qeveria nuk ka marrë në konsideratë tre amendamentet e saj.
Me këto amendamente, LSI kërkonte uljen e TVSH-së për produktet e shportës, rritjen e fashës për përjashtimin nga TVSH për biznesin e vogël, si dhe zerimin e taksës së banesës.
“Normalisht LSI-ja ka paraqitur tre amendime, të cilat fatkeqësisht mazhoranca nuk i mori parasysh. Madje dhe me arrogancë dhe përgjigjet që ne nuk ndryshojmë asgjë, Ministri i Financave u përgjigj që ne nuk ndryshojmë asgjë. Amendimet e LSI-së konsistonin në uljen e TVSH-së për produktet e shportës. Gjithashtu, amendimi tjetër që u rrëzua nga qeveria ishte edhe ai i rritjes së fashës së përjashtimit nga TVSH-ja për bizneset e vogla me xhiro deri në 5 milionë. Pra, të ngeleshim aty ku ky nivel ka qenë. Po kështu, edhe amendimi për taksën e banesave.”
Më tej, Spahiu i është referuar edhe projektligjit për statusin e minatorit, i cili nuk është marrë ende në shqyrtim, edhe pse kanë kaluar afatet ligjore.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.