Qeveria rishikon sërish buxhetin / Rrit shpenzimet me 96 mln euro, për vaksina, dronë, unazën e Tiranës dhe Vlorës dhe TK

Qeveria shqiptare dhe Ministria e Financave dhe Ekonomisë kanë ndërhyrë sërish në buxhetin e shtetit, nëpërmjet një akti normativ që sjell disa ndryshime thelbësore. Sa i përket nivelit të të ardhurave, nuk ka ndryshime, paçka se performance fiskale e 5 muajve të parë të vitit flet për një mbi realizim të planit. Ndryshimet më të mëdha vihen re sa i përket shpenzimeve, nga 598.2 mld lekë që parashikoheshin në aktin e fundit normativ, atë të prillit, në 610 mld lekë në aktin normative që mban datën 22 qershor 2021. Rritja fiksohet në masën 11.8 mld lekë. Për rrjedhojë edhe defiçit buxhetor parashikohet i rritur, nga 108.7 mld lekë, në 120.5 mld lekë, sqaron qeveria në aktin normativ numër.26.

Fondi rezervë ndërkohë është rritur nga 6 mld lekë, në 8 miliardë lekë. Ky ndryshim prej 2 miliardë lekësh justifikohet në relacionin shoqërues të aktit normativ, me nevojën për të financuar 1.1 milionë doza të reja vaksinash. Për këtë qëllim do të duhen 1 mld lekë shtesë nga fondi rezervë. Një miliardë lekët e tjera shtesë do të shkojnë për pajisjen me dronë të Ministrisë së Mbrojtjes në kuadër të kontrollit më të mirë mbi territorin. Në zërin e shpenzimeve korrente vihet re një financim shtesë e specifikuar për bashkinë Tiranë për ndërtimin e godinës së re të Teatrit Kombëtar. Sa i përket shpenzimeve kapitale ndërkohë, akti normativ përfshin rreth 4.8 mld lekë shtesë për unazën e madhe të Tiranës, sidomos sa i përket pjesës veriore të saj, si dhe 1 mld lekë shtesë për vazhdimin e projektit të bypassit të Vlorës.

Duke qenë se rishikimi i buxhetit nuk parashikon rritje të të ardhurave, por vetëm të shpenzimeve, në vlerën e 11.8 mld lekëve, ose rreth 96 milionë euro, do të ketë nevojë për financim shtesë, dhe dalje në tregjet ndërkombëtare.

Reol Korkurti – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.