Qytetet e “painfektuar” nga covid-19 – Në 11 bashki, asnjë rast i ri prej 2 javësh, por mbajtja e maskës është detyrim

Të enjten hyn në fuqi akti normativ i qeverisë për mbajtjen e detyrueshme të maskës edhe në ambientet e jashtme, ndërkohë që nga ky detyrim nuk do të bëjë përjashtim asnjë qytet i vendit. Kjo pavarësisht faktit se në shumë bashki, të paktën në 2 javët e fundit nuk është regjistruar asnjë rast i personave të prekur nga COVID-19.

Sipas të dhënave të raportuara nga Ministria e Shëndetësisë dhe të përpunuara nga televizioni SCAN, janë të paktën 11 qytete përgjatë periudhës 28 shtator- 11 tetor nuk ka patur asnjë të infektuar me COVID-19. Më konkretisht në këtë listë përfshihet: Poliçani, Belshi, Himara, Finiqi dhe Dropulli. Gjithashtu, qytete pa asnjë rast me COVID-19 janë edhe Këlcyra, Libohova, Vau i Dejës, Konispoli, Selenica dhe Pusteci. Megjithatë, akti normative i qeverisë detyron edhe banorët e këtyre qyteteve të mbajnë maskën edhe në ambientet e jashtmë, në mënyrë që të mos preken nga infeksioni.

Në botë, praktikat e mbajtjes së detyrueshme të maskës në ambientet e jashtme janë të ndryshme, por nuk mungojnë rastet kur kjo masë parashikohet vetëm për qytetet ku përhapja e virusit është më e lartë. Italia vetëm së fundi e shtriu në të gjithë vendin këtë detyrim, ndërkohë që në Gjermani, në ambientet e jashmë është detyrim vetëm në disa qyetete. Masa e re e qeverisë shqiptare vjen në një kohë kur numri it ë infektuarve me COVID-19 ka tendencë në rritje, ndërsa Tirana mbetet vatra më e nxehtë e infeksionit.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.