Rajon pa roaming? – E mundur, Shqipëria do të ndryshojë ligjin

Të enjten hyri në fuqi heqja përfundimtare e tarifave të shërbimit roaming për përdoruesit e Bashkimit Europian, çka iu jep qytetarëve të vendeve anëtare lirshmëri të plotë të komunikojnë me tarifat e operatorit të tyre, në të gjithë hapësirën e përbashkët.

Tashmë, edhe Shqipëria do të ndryshojë ligjin “Për komunikimet elektronike”, duke i dhënë mundësi Autoritetit të Komunikimeve Elektronike dhe Postare të rregullojë edhe tarifat e roaming-ut ndërkombëtar të operatorëve.

Në një intervistë për TV SCAN, Altin Rrapaj, drejtor i rregullimit Ekonomik në AKEP, thotë se katër vende të rajonit tonë e kanë tashmë një marrëveshje për ulje graduale të tarifave të roaming që prej vitit 2015. Shqipëria nuk është bërë pjesë e kësaj marrëveshjeje, por mendohet se ndryshimi në ligj do t’i hapë rrugë pjesëmarrjes në nisma të këtij lloji.

“Shqipëria e ka shprehur dëshirën për të marrë pjesë dhe aktualisht, për të patur sigurinë juridike për të implementuar këtë rregullim,kemi menduar si AKEP dhe si ministri dhe në konsulencë me institucionet e Bashkimit Europian që më e mira do të ishte një amendim në ligjin 9918 për të parashikuar mundësinë që AKEP-i të rregullojë tarifat në nivel me pakicë dhe me shumicë për roaming ndërkombëtar. Ministria për Inovacionin dhe Administratën Publike ka nxjerrë në konsultim publik një projektligj për ndryshim në ligjin 9918, ku përfshihet dhe ndryshimi që përmenda për të mundësuar AKEP-in për të rregulluar tarifa të roamingut ndërkombëtar në rast se ka marrëveshje ndërkombëtare”.

Për vendet e Ballkanit Perëndimor, nënshkrimi i një marrëveshjeje për uljen graduale të tarifave  ishte hapi i parë drejt objektivit për krijimin e një hapësire të përbashkët pa kosto roaming, në modelin e Bashkimit Europian. Serbia, Maqedonia, Mali i Zi dhe Bosnja në vitin 2015 ranë dakord të ulin tarifat e roaming-ut ndërkombëtar gradualisht deri në vitin 2017, ndërsa për hapa të mëtejshme do të ketë diskutime të tjera mes vendeve.

“Shqipëria apo edhe vendet e rajonit që nuk janë vende anëtare do të përfitojnë vetëm në kohën që bëhen vende anëtare të Bashkimit Europian dhe nuk ka asnjë mundësi tjetër, sepse BE nuk mund të detyrojë dot vendet anëtare për të aplikuar marrëveshje me vende jo anëtare të BE. Nga raporti është nxjerrë që tarifat janë reduktuar edhe në Shqipëri, pavarësisht se nuk ka qenë pjesë e marrëveshjes me vendet e rajonit. Me vendet që ka më shumë trafik, apo shkëmbim përdoruesish është vënë re një rënie tarifash dhe reduktim i tarifave nga operatorët”.

Ekspertët mendojnë se krijimi i një hapësire të përbashkët pa tarifa roaming në Ballkanin Perëndimor mund të realizohet me vullnetin e të gjitha vendeve, ndërsa përfshirja në hapësirën pa tarifa roaming të Bashkimit Europian nuk do të jetë e mundur për Shqipërinë dhe vendet e tjera kandidate para anëtarësimit të plotë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.