Rajoni humbet 18% të PBB – Majlinda Bregu: Kaq na kushton diskriminimi gjinor, duhet të investojmë

Në ditën ndërkombëtare të grave dhe vajzave, kryetarja e Këshillit të Bashkëpunimit Rajonal, Majlinda Bregu, ka lëshuar një mesazh të qartë për rajonin, duke nënvizuar se sfida e vërtetë është pikërisht përfshirja ekonomike dhe financiare e tyre.

 “Çelësi në zhbllokimin e potencialit ekonomik të rajonit janë gratë, të cilat vazhdojnë ende të luftojnë për të arritur sigurinë ekonomike. Është e vërtetë se gratë dhe vajzat po marrin më shumë diploma universiteti se meshkujt, por sërish vetëm 1 në 2 gra ose vajza në Ballkanin perëndimor ka një punë, apo është duke e kërkuar një të tillë. Çdo vit, ekonomitë e Ballkanit Perëndimor humbasin, mesatarisht 18% të Prodhimit të Brendshëm Bruto si rrjedhojë e hendekut gjinor në tregun e punës. Kjo është më shumë se e gjithë ekonomia e Serbisë”

Ndër të tjera, zonja Bregu nënvizon edhe faktin se në këtë drejtim, vendet e rajonit duhet të investojnë bindshëm, duke e parë këtë si një investim për të ardhmen e tyre.

“Investimi në aftësitë e lidershipit të grave dhe vajzave është jetike. Nuk duhet parë si diçka dytësore. Ndihma ndaj grave dhe vajzave të rajonit për të përmirësuar aftësitë e tyre dhe për t`u përshtatur me një bote në ndryshim të shpejtë, do të jetë sfida e vërtetë për ne. Duhet të fokusohemi te edukimi financiar, përfshirë trajnimin dhe identifikimin e projekteve dhe shërbimeve të duhura, duke siguruar që gratë dhe vajzat t`i përdorin burimet e nevojshme financiare, si dhe të promovojmë biznesin e tyre”.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.