Rajoni tashmë me regjistër të përbashkët biznesi – BIFIDEX, i financuar nga BERZH. Shqipëria me 3 shtete të tjera, do bashkohen të tjerë
Tashmë, sipërmarrësit në rajon apo aspirantët për t`u bërë të tillë, sidomos ata me ambicie rajonale, kanë në dispozicion një platformë rajonale për të kërkuar kompanitë, biznesmenët, apo edhe të vihen në kontakt me ta. BIFIDEX është tashmë aktive si një portal i regjistrit të biznesit të Europës Juglindore, dhe deri më tani, në të janë përfshirë 4 shtete: Shqipëria, Serbia, Maqedonia e Veriut dhe Bosnje Hercegovina.
Kjo platformë funksionon në mënyrë të ngjashme me një regjistër biznesi, si ai i Qendrës Kombëtare të Biznesit, por duke ofruar kufizime për të dhëna të zgjeruara, por që nga ana tjetër ofron mundësi kontakti mes sipërmarrësve, si një mënyrë për të gjetur një partner biznesi. Projekti i BIFIDEX është i financuar nga Banka Europiane për Rindërtim dhe Zhvillim (BERZH), në kuadër të përpjekjes për të nxitur investimet në rajonin e gjerë të Europës jug-lindore, por edhe për të mbështetur iniciativën e një tregu të përbashkët në Ballkanin Perëndimor. Regjistri ëshët i lidhur me regjistrat kombëtar të biznesit në Shqipëri, Serbi, Bosnje Hercegovinë dhe Maqedoni të Veriut, dhe shumë shpejt do të bashkohen edhe vende të tjera të rajonit. Veç këtyre të dhënave, regjistri rajonal i biznesit ofron edhe një sërë të dhënash të tjera statistikore.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.