Rama inspekton rrugën Kardhiq-Delvinë – “Duhet projekt për rehabilitimin dhe gjelbërimin e anëve të rrugës”
Kryeministri Edi Rama inspektoi punimet në lotin e katërt të rrugës Kardhiq- Delvinë ku u njoh nga afër me investimin, i shoqëruar nga Drejtorja e Autoritetit Rrugor Shqiptar, Sonila Qato. Rama kërkoi që krahas plotësimit të standardeve të sigurisë rrugore, të ecet edhe me një projekt të posaçëm për rehabilitimin dhe gjelbërimin e pjesëve që janë prekur nga ndërtimi i rrugës.
“Kjo është nga pjesët më problematike që kemi trashëguar ne edhe si kulturë pune edhe si inerci që këto ngrëniet të hyjnë në fazë rehabilitimi me ato sistemet që nxjerrin bimësi. Duhet bërë një projekt siç e ka gjithë bota normale, që aty ku gërryhet mali, ose kodra për arsye të veprës, të krijohen kushte për rehabilitim. Sfida jonë është që jo vetëm të bëjmë rrugë ku të kalojnë njerëzit, por edhe rrugë cilësore, të qëndrueshme dhe nga pikëpamja mjedisore të pakontestueshme.” –tha Rama.
Ndërsa Qato theksoi impaktin e drejtpërdrejtë që pritet të ketë ndërtimi kësaj rruge në zhvillimin e turizmit.
“Është një nga akset më të rëndësishme, sepse ndërtimi i të gjithë segmentit nga Kardhiqi në Delvinë realizon jo vetëm ndërtimin e një rruge të re, por edhe prioritetin që ka qeveria në nxitjen e investimeve në turizëm. Kjo rrugë do ta lehtësojë në mënyrë të jashtëzakonshme turizmin, duke lidhur në një zonë të vetme Gjirokastrën, Sarandën, por edhe Tepelenën për të cilën ne jemi duke punuar në by-pass-in e Tepelenës. Jemi munduar që të mbajnë ritmin e punës, të garantojmë cilësinë, në mënyrë që çdo para e taksapaguesve të shkojë në vepra cilësore publike dhe mbi të gjitha të mund ta realizojmë në kohë, siç është parashikuar në muajin nëntor të vitit 2020,” -u shpreh Qato.
Më pas kryeministri, i shoqëruar edhe nga Ministrja e Shëndetësisë, Ogerta Manastirliu, u ndal në qendrën shëndetësore në Lunxhëri të Gjirokastrës e cila tashmë është një tjetër qendër e transformuar nga programi kombëtar për rindërtimin e 300 qendrave shëndetësore.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.