Rama mbi Kodin Etik – Nuk ka udhëtime me “bussines class” as pagesa për qeveritarët nga kompani private
Kryeministri Rama gjatë fjalimit të mbajtur në mbledhjen e parë të qeverisë pas ceremonisë së betimit ka folur edhe për Kodin Etik ku ka përmendur udhëtimet, pushimet, drekat, darkat, lëvizjet me makina zyrtare, fluturimet apo dhuratat që nuk duhet të merren si sende personale për t’i dërguar në shtëpi.
“Çdo anëtar kabineti të betohet këtu dhe para publikut për besnikëri dhe respektim të Kodit Etik, duke marrë qysh sot përgjegjësinë personale. Kodi është në fuqi dhe do them vetëm disa pika kyçe. Fjalët janë rrjedhoja edhe e eksperiencës së këtyre viteve por dhe nevoja që puna të jetë sa më njehsuar në pritshmërinë e qytetarëve ndaj nesh”, u shpreh Rama
“Për shembull, në Kod thuhet se asnjë qeveritar s’mund të udhëtojë me bussines class, apo që të udhëtojë jashtë, të drekojë apo darkojë. Mund të largohet vetëm për raste familjare, apo kur ka arsye pune të njoftuara më herët. Për udhëtimet dhe pushimet janë zbatuar nga ne, dhe kjo ka shënuar ndryshim në aspektin etik në krahasim me ato të mëparshme”, theksoi kryeministri.
“Një ministër s’mund të pranojë bileta udhëtimi të paguara nga kompani private, as për veten, bashkëshortin apo fëmijët. Bashkëshortët e anëtarëve të kabinetit s’mund të përdorin sallën VIP nëse nuk udhëtojnë me ministrin përkatës. Kjo vlen edhe për makinat zyrtare,” tha Rama
Drekat dhe darkat, kjo pikë nuk është zbatuar: E them publikisht që qytetarët ta dinë se qeveria ka Kod Etik dhe nuk është një kornizë normash por një mënyrë jetese për jetën publike të çdo ministri. Nëse nuk respektohen këto ministra do kërkojë ndjesë publike, nëse përsëritet do lirojë vendin në këtë tryezë. Vlen edhe për mua dhe me vjen mirë ta them, s’e kam pas problem ta respektoj 8 vjet, s’e kam as për 4 vjet të tjera” shtoi kryeministri.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.