Rama me të rinj në fushën e teknologjisë: “Do të mundësojmë tregun global, nuk do të keni nevojë të ikni “
Kryeministri Edi Rama zhvilloi një takim me të rinjtë e angazhuar në teknologji, ku premtoi mbështetje. Sipas Ramës të rinjtë nuk do kenë nevojë të ikin jashtë pasi qeveria do të bëjë gjithçka për t’u siguruar tregun global. Rama premtoi fond garancie sovrane që do ti lehtësojë aksesin të rinjve në financimin e aktivitetit
“Si t’u japim të rinjve dhe të rejave që kanë pasur mundësinë të ikin diku tjetër, por duke qëndruar këtu, të angazhohen në një treg si është tregu i madh global. Jo vetëm kaq, por të kenë dhe të ardhura goxha të mëdha. Është kjo mundësia për t’u rritur në nivelin e aktivitetit ‘online’, dhe ju dhe ne që jemi përfaqësues të interesit publik. Ta arrijmë brenda kësaj dekade dhe ajo që kemi hedhur si bazë gjatë qeverisjes digjitale, ku ne sot jemi të parët në rajon për nga shumëllojshmëria e shërbimeve publike që ofrohen ‘online’. Për të shkuar në nivel tjetër na duhet një bashkëveprim shumë intensiv.”
Kryeministri garantoi se do të rritet buxheti i universiteteve, që të mundësohen programet e huaja dhe studentët të mos largohen nga Shqipëria.
“Do të vendosim 10 milion euro në fillim që t’i nxisim universitet të lidhen me universitetet e huaja. Të ketë p.sh. në Universitetin e Gjirokastrës programe të një universiteti të huaj, që studimi të bëhet këtu dhe të rinjtë të mos kenë nevojë të ikin. Po flas për integrimin e universiteteve tona me universitetet e huaja”.
Rama shtoi se zgjerimi i shërbimit online ka është synim i qeverisë për të lehtësuar dhe përshpejtuar shërbimin. Sipas tij aktualisht në vendin tonë ofrohen 95% e shërbimeve online.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.