Rama merr Timonin – Surprizat dhe dështimet që sollën zgjedhjet

Pas një fushate intensive një mujore dhe një mandati qeverisës, Ramës i është besuar timoni i qeverisë, ashtu siç e kërkoi. Gjatë fushatës, ku Rama kërkonte timonin nga qytetaret për të bërë shtetin e së drejtës me reformat e nisura, ndërsa Basha kërkonte që të ndizte motorin e ekonomisë, Partia Socialiste ka rezultuar fituese.

Partia Socialiste, për herë të parë, ka fituar në të 24 njësitë në Tiranë, duke u bërë kështu kryeqyteti udhëheqës i fitores së PS, në të gjithë vendin. Edhe pse Rama gjatë fushatës ka kërkuar 71 mandate, shqiptarët i besuan 74, duke i dhënë mundësinë që të krijojë i vetëm qeverinë e ardhshme.

Nëse i referohemi Partisë Demokratike, ajo ka pësuar një humbje të thellë e cila nuk mund të imagjinohej as në ëndrrat më të këqija të kësaj partie dhe të simpatizantëve të saj. Këtë vit, PD do të ketë vetëm 43 mandate nga 50 të tillë që kishte fituar në vitin 2013. Këtë 4-vjeçar Parlamenti do të këtë përfaqësi vetëm nga pesë subjekte politike, PS, PD,  LSI, PDIU dhe PSD.

Lëvizja Socialiste për Integrim, edhe pse pretendonte që të dilte forcë e parë në këto zgjedhje përsëri u listua e treta në renditje me 19 mandate, duke shënuar një rritje në krahasim me vitin 2013, kur kishte 16 mandate. PDIU ka humbur një mandat, duke numëruar vetëm tre të tillë nga katër që kishte siguruar në zgjedhjet e mëparshme. Surpriza e listës së mandateve ishte edhe fitorja e Tom Doshit në Shkodër, i cili garonte nën logon e PSD-së.

Këtë vit, në garë morën pjesë edhe subjekte të reja politike, të cilat dukej se kishin fituar simpatinë e qytetarëve por që fatkeqësisht nuk siguruan asnjë mandat në parlament, madje as nuk kaluan pragun e 3%.

Këtu mund të përmendim LIBRA-n e Ben Blushit dhe “Sfida për Shqipërinë” të Gjergj Bojaxhi. Nëse marrim në konsideratë rezultatin dhe tonet e ashpra të shkëmbyera mes forcave politike, ajo që na mbetet, është të shpresojmë që opozitarët të bëjnë një opozitë sa më aktive, në katër vitet e ardhshme.

Entela Barjamaj/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.