Rama: Në qershor formësojmë Agjencinë e Trajtimit të Pronave
Agjencia e Trajtimit të Pronave, e cila do të vijë si një shkrirje e Agjencisë së Legalizimeve dhe Zyrave të Regjistrimit të Pasurive të Paluajtshme do të krijohet deri në qershor.
Lajmin e ka bërë të ditur kryeministri Edi Rama gjatë një takimi me drejtorët e rinj të Hipotekave dhe ALUIZNI-t në kuadër të shërbimeve për qytetarin të ofruara përmes platformës qeveritare.
“Deri në qershor do të kemi formësuar Agjencinë Kombëtare të Titujve të Pronësisë, një bashkim i këtyre institucioneve.”
Edhe pse i ka cilësuar Hipotekat dhe ALUIZNI-in si institucione me probleme, sipas tij brenda sistemit ka edhe shembuj të shkëlqyer, pavarësisht se sistemi nuk ka përfunduar ende plotësisht.
“Hipotekat e ALUIZNI kanë probleme, por ka edhe shembuj të shkëlqyer brenda sistemit që vlejnë për të ndarë shapin nga sheqeri, edhe pse ky proces është larg të qenit i përfunduar.”
Kryeministri u ndal gjithashtu edhe te hartat e ALUIZNIT, sipas të cilit tashmë janë të aktualizuara.
Duke cilësuar ALUIZNI-n si institucionin që nuk ka asnjë vonesë në dhënien e përgjigjeve dhe shqyrtimin e ankesave të qytetarëve përmes platformës së bashkëqeverisjes, Rama e mbylli fjalën tij me një mesazh ndaj Drejtorit të Përgjithshëm të Hipotekave:
“Ai duhet të bëjë të njëjtën gjë si Lame. Mos të kemi asnjë vonesë në dhënien e përgjigjeve ndaj qytetarëve.”
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.