Rama në Vlorë për Paktin e Mirëqenies Sociale: Kemi ndërtuar sistem kompakt të shërbimeve sociale
Kryeministri Edi Rama ishte i pranishëm në një takim në Vlorë me përfitues të “Paktit Kombëtar të Mirëqenies Sociale”.
“Në vetëm tre vite e gjysmë punë është krijuar një kornizë e plotë ligjore. Pa këtë strukturë skemat sociale do të kishin falimentuar plotësisht”, u shpreh Kryeministri.
Rama foli për suksesin e reformave të ndërmarra në këtë fushë, duke thënë se arritjet e nuk do të ndalen këtu, pasi qeveria do të vijojë me reformat.
“Reformat janë e vetmja rrugë për të kuruar sëmundje të rënda kronike. Nuk mund të themi se sektorët janë ripërtërirë tërësisht, por mund të themi se është ndalur hemorragjia dhe janë riaktivizuar funksionet jetësore të shtetit. Tani na duhet të vazhdojmë me këmbëngulje çdo hap për të rimëkëmbur organizmin e shtetit”, tha Rama në fjalën e tij.
Sipas kryeministrit, që të vijojnë këto reforma, është e nevojshme të kryhet vettingu dhe të çlirohet drejtësia.
Rama vlerësoi Vlorën si shembull për shërbimet sociale të ofruara, ndërsa njoftoi edhe zgjerimin e hartës sociale me 17 shërbime të reja deri në vitin 2018.
Në fund të këtij takimi është firmosur pakti mes Ministres së Mirëqenies Sociale Olta Xhaçka dhe Kryetarit të Bashkisë Vlorë Dritan Leli, ndërsa firmën për kryeministrin Rama e hodhi një vajzë e pranishme në takim.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.