Rama nga Qendra e Emergjencave në Durrës: ”Të pastrohet qyteti para Vitit të Ri, ja detyrat që do të ndiqen në vijim”
Kryeministri Rama ka qenë i pranishëm në ditën e sotshme në zonën e Kënetës, Durrës ku ka folur me banorët në lidhje me hapat që do të ndiqen për përballimin e situatës pas tërmetit shkatërrues që solli plot 51 viktima dhe qindra të plagosur.
Pas takimit me banorët, shefi i ekzekutivit ka zhvilluar një mbledhje në Qendrën e Emergjencave të Bashkisë Durrës.
Ministri Çuçi si personi përgjegjës me fuqi të jashtëzakonshme për drejtimin e operacioneve ka shpjeguar situatën e deritanishme , duke theksuar se situata është vënë në kontroll në shumicën e vendeve të prekura nga tërmeti. Hapat e mëtejshëm që do të ndiqen sipas tij do të jenë mjaft decizive. Ai gjithashtu propozoi krijimin e një formulari unik për vlerësimin e dëmeve:
“Do të krijojmë bazën e një formulari që e përdor e gjithë bota për vlerësimin e dëmeve në infrastrukturën e ndërtesave. Në këtë mënyrë do të jetë lehtësisht e menaxhueshme sasi e informacionit që do të marrim. Ndërkohë e mira tjetër është që të dhënat do të hidhen të gjitha elektronikisht dhe do të jetë më e kollajshme për identifikimin e pallateve, vendndodhjen e tyre dhe çdo informacion tjetër, që do i shërbejë strukturave tona.”
Më pas, fjalën e ka marrë kryeministri, i cili i ka komunikuar grupit të emergjencës disa detyra mjaft të rëndësishme për të kryer në ditët në vijim:
“E para, duhet krijuar lista e investitorëve që kanë ndërtuar pallate, të cilat janë të dëmtuara dhe për të cilat grupet e ekspertëve thonë se janë të riparueshme. Këta do thirren dhe do t’i riparojnë sipas standarteve.” – u shpreh ai ndërtuesit.
Detyra e dytë, sipas kryeministrit është identifikimi i pallateve të cilat duhen shembur dhe sipas tij duhet parë me kujdes situata e pastrimit të inerteve. Pa ardhur Viti i Ri, sipas tij Durrësi duhet të jetë tërësisht i pastruar.
“Në Porto Romano duhet të jetë vend depozitimi i të gjitha inerteve, i cili më pas do të shndërrohet në një park pas kalimit të kësaj situate.” – tha ndër të tjera kreu i ekzekutivit.
E treta, kryeministri kërkoi hartën e tokës shtetërore që ndodhet në zonën e Universitetit të Durrësit.
Për punonjësit e administratës së Durrësit Rama kërkoi që ata të dalin në terren për orientimin e njerëzve:
“Nga nesër në mëngjes të gjithë punonjësit e Bashkisë së Durrësit, duhet të ndodhen nga dy persona, gra dhe vajza kryesisht, që të rrinë dhe të shpjegojnë me qetësi për banorët e shqetësuar hapat e mëtejshëm që do të ndiqen. Akomodimit të banorëve sipas tij duhet t’i jepet gjithashtu prioritet.”
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.