Rama njofton ligjet e reja: “Burg dhe heqje patentash për të pabindurit. Paketë e Zgjeruar ekonomike për bizneset”
Kryeministri Edi Rama ka lajmëruar nëpërmjet një postimi në rrjete sociale se qeveria po bën gati një Paketë të Zgjeruar ekonomike si dhe një sërë masësh civile e penale, që sipas tij do të ndihmojnë Shqipërinë të përballojë më lehtë krizën e COVID-19.
Brenda 15 prillit kjo paketë do të jetë gati për tu votuar në parlament, u shpreh kryeminsitri, për t’i kthyer Aktet Normative në ligje.
Ndryshimet do përfshijnë Kodin Penal dhe Rrugor, ku do ketë ashpërsime për të pabindurit nga masave shtrënguese. Në ligj do të sanksionohet edhe se kush thyen masat do të përfundojë në burg, ndërsa do i hiqet edhe leja e drejtimit të makinës për disa vite.
Njoftimi i plotë:
“Masat e reja shtrënguese, për të cilat po përgatitemi t’i drejtohemi parlamentit për ndryshime në kodin penal & rrugor të Republikës së Shqipërisë, në kushtet e gjendjes së fatkeqësisë natyrore dhe specifikisht epidemisë, nga njëra anë do të mbrojnë popullin nga të pabindurit deri në fund të kësaj lufte, nga ana tjetër do të garantojnë lehtësimet e nevojshme në vazhdim, duke siguruar shëndetin e qytetarëve.
Heqja e lejes së drejtimit të automjetit për disa vjet, e po ashtu heqja e lirisë, për disa apo shumë vite sipas shkallës së shkeljes, do të kthehen në norma bindëse për të siguruar fitoren e luftës pa rrezikuar arritjet e derisotme dhe rrugën e rimëkëmbjes ekonomike pa cënuar shëndetin e askujt. Brenda 15 prillit do të kemi paketën e zgjeruar financiare dhe gatishmërinë për miratimin e masave lehtësuese në qeveri, si edhe të masave të reja penale në Kuvendin e Shqipërisë” shkruan Rama.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.