Rama: Pagat në Policinë e Shtetit u rritën me 45%. Xhafaj: Emërimet janë bërë e do bëhen sipas meritokracisë

Gjatë prezantimit të ministrit të ri të Punëve të Brendshme, Kryeministri Rama foli edhe për disa arritje të tjerë në lidhje me pagat, apo edhe me arsimimin e punonjësve në Policinë e Shtetit.

“45 për qind u rritën pagat në Policinë e Shtetit në këto tre vite e gjysmë. Tre vite më parë, pagat e policisë ishin ulur 2 herë dhe punonjësit nuk merrnin asnjë shpërblim për punën jashtë orarit. Kjo histori tani ka marrë fund. Sigurojmë që do të kemi policinë më të paguar dhe më shembullore në rajon. Për të shkuar drejt objektivit tonë, Policia e Shtetit të jetë mbi mesataren e policive të Bashkimit Europian”, u shpreh Rama.

Kreu i kabinetit qeveritar foli edhe për arsimimin e punonjësve të policisë. “Kemi rritje me 33 për qind të punonjësve me arsim të lartë. Kemi 1500 studentë të pranuar në tre vitet e fundit në Akademinë e rilindur të Policë së Shtetit. Shumë është bërë, më shumë mbetet për t’u bërë” pohoi kryeministri.

Gjatë fjalës së tij, në postin e ministrit të ri të Brendshëm, Xhafaj u shpreh se në Policinë e Shtetit emërimet janë bërë dhe do të bëhen në bazë të meritokracisë. “Policia e Shtetit është e përbërë nga një trupë e zgjedhur. Kriteret e emërimit janë bërë dhe do të bëhen mbi bazë të meritokracisë”, tha Xhafaj.

Gjithashtu ai konfirmoi se do të vijojë të ndjekë procesin e reformave, të nisura nga paraardhësi i tij Tahiri, duke thënë “ Detyra ime prioritare është të konsolidoj më tej arritjet”.

 Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.