Rama paralajmëron investime madhore: Do ndërtojmë 2 aeroporte te reja, resorte me 5 yje e rrugë të reja në çdo qark
Në “Komunikimin Javor” kryeministri Edi Rama bëri publike prioritetet e mandatit të dytë 4 vjeçar duke u fokusuar te investimet. Në fjalën e tij, Rama njofton ndërtimin e dy aeroporteve në 4 vitet e ardhshme, atij të Vlorës dhe atij të Sarandës që, sipas tij, do të sjellë edhe uljen e çmimit të biletave.
“Ndërtimi gjatë 4 viteve të ardhshme i aeroportit kombëtar të Vlorës dhe i aeroportit turistik të Sarandës së bashku me rritjen së shpejti dhe ngritjen të qëndrueshme vit pas viti të linjës ajrore shqiptare është rruga e duhur për të shumëfishuar fluturimet në Shqipëri si dhe për të ulur përmes një konkurrence të ndershme tarifat e papranueshme të aeroportit të Rinasit dhe po ashtu çmimet shumë ekzagjeruara të biletave të avionëve që ulen në vendin tonë dhe për të cilat të gjithë qytetarët ankohen” tha Rama.
Më tej, kryeministri tha se në mandatin e ri do të konkretizohen disa hapa që lidhen me zhvillimin e turizmit. “Po mendoj prej kohësh që të shkojmë në një fazë të re. Fillimisht duke ndërtuar kapacitete me 5 yje dhe paralelisht duke vijuar zbatimin e mëtejshëm të programit kombëtar të rilindjes urbane. Për sezonin e ardhshëm do të ketë përfunduar realizimi i projektit të Himarës, Vunoit, Jalës, Dhërmiut të vjetër dhe plazhit poshtë në Dhërmi.
Ndërkohë do të përgatiten projektet për zonën e Golemit, Spillesë, Velipojës, Liqenit të Shkodrës, Vermoshit, Dumresë, Radhimës, Kurveleshit, Frashërit etj në çdo qark të Shqipërisë” tha Rama. Po ashtu, kryeministri paralajmëroi restaurimin e Piramidës dhe Muzeut në Tiranë. Kryeministri njoftoi edhe një program të ri kombëtar që shkon në linjë me projektin e rilindjes urbane,projektin e bujqësisë e të agroturizmit.
“Ka ardhur koha që me qeverisjen pa koalicion të krijohet mundësia që të ngremë një program kombëtar të rilindjes rurale që do të jetë komplementar me atë të rilindjes urbane dhe do të mbështesim mëkëmbjen e infrastrukturës në bazë të prodhimit bujqësor blegtoral dhe zhvillimit të agroturizmit në hapësirat rurale të bashkive të reja. Rruga e Arbrit që nis më në fund brenda kësaj vjeshte si projekti i parë i programit 1 mld për rindërtim do të krijojë kushte që në hartën e turizmit rural të hyjë dhe zona e Dibrës që afrohet shumë me Tiranën.
Me këtë program do të financojmë edhe një rindërtim spektakolar në funksion të turizmit të rrugës nga Uji i Ftohtë, Radhimë, Orikum, Llogara, Himarë ku segmente rrugore të fshatrave të rilindur të Jonit do të kthehen në pedonale përmes ndërtimit të urave panoramike për makinat. Do të financojmë rrugën e re Delvinë-Kardhiq dhe rrugën Kurvelesh – Himarë për të integruar Vlorë dhe Gjirokastër në funksion të zgjerimit të hartës turistike të jugut dhe të një stimulimi të fortë të turizmit rural e kulturor.
Do të financojmë rrugën e re Milot-Lezhë duke anashkaluar kthesën e sotme si qorre në Shkodër si dhe segmentin lidhës Shëngjin-Velipojë që do të nxisë fort zhvillimin turistik në vijën e sipërme bregdetare të Adriatikut. Do të financojmë rindërtimin e rrugës së Thethit që bashkë me përfundimin e rrugës së Velipojës që sapo e kemi nisur do të integrojmë në standard europiane hartën turistike të Shkodrës së bukur. Do të financojmë edhe akse të tjera strategjike për ekonominë e për turizmin në çdo qark të Shqipërisë” tha Rama.
Këto investime, sipas kryeministrit, do të injektojnë në ekonomi një sasi të konsiderueshme paraje që do të mundësojë një rritje ekonomike mbi 5 % dhe një nivel punësimi të konsiderueshëm.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.