Rama pas vizitës në Berlin: “Ekonomia, pjesë e bisedës me Merkel, rritim shkëmbimet tregtare mes vendeve”
Pas kthimit nga Gjermania, kryeministri Edi Rama ka zhvilluar një konferencë për shtyp, duke e konsideruar si të suksesshme vizitën e zhvilluar në kuadër të procesit të hapjes së negociatave për anëtarësim në Bashkimin Evropian.
Ndërkaq, i pyetur nga TV SCAN Rama tha se një pjesë e bisedës me kancelaren Merkel iu kushtua edhe zhvillimit ekonomik, ku u diskutua mundësia e rritjes së shkëmbimeve tregtare mes 2 vendeve.
Rama nuk e konsideroi një kartë të luajtur prej tij, deklaratën për rritje të myslimanizmit radikal dhe ndikimit rus në Ballkan, nëse Bashkimi Evropian nuk hap negociatat, pavarësisht se qëllimi vizitës në Gjermani ishte diskutimi mbi progresraportin Komisionit Europian dhe plotësimin e parakushteve.
Teksa foli mbi qëndrimin e Merkel, Rama shtoi se qëllimi i vizitës në Berlin nuk ishte ‘po’-ja publike e kancelares për hapjen e negociatave për anëtarësimin në Bashkimin Evropian, por shkëmbimi i opinionit lidhur me raportin e progresit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.