Rama për biznesin e madh: “Nisni proces vetërregullimi. Nga janari forca e ligjit do ushtrohet më fort se asnjëherë më parë”
Kryeministri Rama në komunikim e javës iu adresua biznesit të madh, i cili tanimë duket se është vënë në qendër të aksionit anti-informalitet. Dy janë aspektet kryesore që do të vihen nën lupën e tatimeve: deklarimi jo i saktë i pagave dhe bilancet fiktive.
Sipas Ramës, 2/5 e punonjësve të bizneseve të mëdha rezultojnë me pagë minimale, çka sjell në shmangien e detyrimeve si tatimi mbi të ardhurat dhe evazion në pagesat e kontributeve.
“Janë identifikuar afërsisht 40% e të punësuarve në bizneset e mëdha, ose 42 mijë të punësuar të regjistruar, të deklaruar me pagë minimale deri në 30 mijë lekë. Ndërkohë që vetëm 7%, ose rreth 8 mijë të punësuar deklarohen me pagën mbi 130 mijë lekë.
Deri e të punësuar si ekonomistë, inxhinierë, juristë, llogaritarë e të tjerë, që paguhen në fakt jo aq, deklarohen nga bizneset si të punësuar me një pagë nën 30 mijë lekë në muaj. Kjo është jo vetëm e pajustifikueshme në çdo pikëpamje, por edhe e dënueshme ligjërisht për kompanitë”, tha kryeministri.
Rama u shpreh se kjo nuk do të tolerohet më nga ana e qeverisë dhe se do të ndiqet nga goditje në fillim të vitit të ardhshëm.
“Në janar tradita çerekshekullore e biznesit të madh që punon me dy bilance, do të marrë një goditje të fortë, sepse qeveria do të njohë vetëm bilancet e paraqitura prej kompanive në banka dhe bilancet e tatimeve do duhet të jenë të përputhura me ato të bankave për çdo kompani”, tha Rama.
Rama ftoi kompanitë të nisin një proces të shpejtë dhe të thellë vetërregullimi, pasi sipas tij, forca e ligjit do të ushtrohet më fort se asnjëherë më parë mbi çdo biznes që do të gjendet në kushtet e mashtrimit me pagesat e detyrimet.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.