Rama për metodat fiktive të pagave nga punëdhënësi – Sugjeron një mbrojtje financiare për ata që marrin guximin të denoncojnë
Në mbledhjen e sotme të Këshillit të Ministrave u vendos mbi hapjen e procesit gjithëpërfshirës të Këshillimit Kombëtar për Shqipërinë. Me një pyetësor drejtuar çdo shqiptari, në Shqipëri apo në botë, do të zhvillohet një kuvendim popullor, ku do të merret mendimin i qytetarëve mbi çështje me rëndësi strategjike për vendin, ekonominë, shoqërinë.
Një ndër çështjet që kryeministri përmendi ishte edhe ajo e metodave fiktive të pagave nga punëdhënësi.
“Një problem tjetër i madh është problemi i të punësuarve që janë viktima të metodave fiktive të pagave nga punëdhënësi. A duhet ne të angazhohemi për t’ju dhënë një mbrojtje të veçantë me një dëmshpërblim atyre që marrin përsëri të denoncojnë, por që njëkohësisht janë menjëherë dhe subjekt i largimit nga puna për hakmarrje, që do të thotë që ne si shtëpi e përbashkët të angazhohemi dhe financiarisht ndaj këtyre njerëzve, për t’i dhënë dhe një mbrojte financiare në një periudhë të caktuar kohe? Apo kjo është një barrë më shumë në shtëpinë e përbashkët e duhet adresuar në forma të tjera?”, u shpreh Rama.
“Natyrisht që në pamje të parë, duket se konsensusi i lidhur me këtë është logjik, por nga ana tjetër, së pari, duam të sigurohemi që këtu kemi, jo mbështetje të një shumice që na ka votuar për të qeverisur, por një shumice përtej saj, pa u ndarë tanët dhe të atyre, të majtë e të djathtë e me radhë dhe për këtë arsye, gjithë ky pyetësor shkon në këtë drejtim; për të kompaktësuar bashkërisht qëndrimet lidhur me të ardhmen e shtëpisë sonë të përbashkët dhe me mënyrën se si shtëpia jonë e përbashkët funksionon sot, duke pasur parasysh që kësaj shtëpie i vinë dëme të njëpasnjëshme dhe të vazhdueshme nga ndasia dhe sherri politik”, tha kryeministri.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.