Rama pezullon tarifën – “Nuk ka pagesë në Rrugën e Kombit pa gjetur zgjidhjen për qytetarët”
“Nuk do të fillojmë sistemin e pagesës pa u gjetur zgjidhja më e mirë për qytetarët në Rrugën e Kombit”. Kjo ishte deklarata e kryeministrit Edi Rama në seancën plenare të Kuvendit ku mungonin deputetet e opozitës. Vetëm pas disa ditëve protesta nga ana e qytetarëve, kryeministri pranoi se nuk janë bërë konsulta dhe se vendosja e tarifës fillimisht do të sqarohet.
“Ajo që duhet përsëritur nga ana ime dhe e qeverisë është vetëdija për përgjegjësinë time dhe tonë për pamjaftueshmërinë e shpjegimeve dhe të sqarimeve lidhur me këtë çështje. Nuk kemi pasur intuitën e duhur për të kuptuar domosdoshmërinë e sqarimit të gjithë kësaj çështje, përpara se të vendosej sistemi i pagesës”, u shpreh Rama.
Lidhur me protestën e opozitës në mbështetje të qytetarëve, Rama u shpreh se ajo po shfrytëzon momentin për të tërhequr sa më shumë njerëz pranë vetes.
“Meqë opozita nuk është nuk do të merrem me pse-të dhe si-të e opozitës që e ka humbur rrugën dhe kërkon të tërheqë sa më shumë njerëz në rrugën e saj pa krye, po do të merrem me atë që është detyra jonë e ditës, shpjegimi me durim i cështjes që ka shkaktuar pakënaqësinë e banorëve të zonës së Kukësit”, tha Rama.
Rama theksoi rëndësinë e pagesës për mirëmbajtjen e rrugës, për të shmangur sipas tij, hendekun që mund të krijohet në të ardhmen. Kryeministri u ndal tek tarifat që i duhet shtetit të paguajë për rrugët duke thënë se, pagesa e detyrimit principal për rrugët në një vit arrin deri në 110 milionë dollarë, ku 37% të kësaj pagese e zë Rruga e Kombit.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.