Rama: Rritje ekonomike me 5%, nëse rriten investimet e huaja dhe ato të brendshme. Duhet garantuar prona
“Ne duam një ekonomi që rritet më shpejt. Rritja sot është 3.5 për qind, duam të shkojmë në 5 për qind që çdo familje të marrë impaktin nga kjo rritje”. Kështu është shprehur gjatë një takimi me studentë dhe pedagogë kryeministri Rama, ku ndër të tjera shtoi se “Që ekonomia të rritet me 5 për qind duhet të rrisim kapacitetin e injektimit të parasë në ekonomi. Nëse nuk rrisim investimet e brendshme dhe të huaja, ne do ta kemi shumë të vështirë të shkojmë në 5 për qind rritje ekonomike”.
Sipas kryeministrit Rama “rritja e investimeve të huaja ka si kusht themelor qëndrueshmërinë e marrëveshjes bazë të një shteti demokratik, siç është marrëveshja e pronës dhe qëndrueshmëria e kontratës”
Kreu i qeverisë foli edhe për mënyrën që duhet ndjekur për të rritur investimet në turizëm. “Si mund të rrisim ne investimet e qëndrueshme në turizëm? Ne kemi nevoje për komplekse turistike me 5 yje, jo komplekse që yjet i vendosin shqiptarët me një të rënë të çekiçit, por që janë të certifikuara nga agjencitë që certifikojnë hotelet”
Sipas Ramës, investitorët e huaj i pengon garancia e pronës. “Ajo që nuk e kemi të thjeshtë është nuk kemi marrëdhënien e duhur të gjykatave me pronat. Investitorët e huaj i pengon garancia e pronës. Si mund të vijnë të investojnë pasurinë e tyre në një vend kur një ditë dikush del e i thotë jemi ne pronarë. Ja pse reforma në gjyqësor është me rëndësi ë zhvillimin ekonomik dhe social”, shtoi Rama.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.