Rama-Senatit të UT: Nuk ndërhyjmë, kjo është autonomia juaj. Granti në varësi të performancës
Situata në Universitetin e Tiranës ka detyruar mbledhjen në një takim mes Senatit të UT, ministres së Arsimit Lindita Nikolla dhe kryeministrit Edi Rama.
Rama vuri në dukje mosprezencën në takim të disa prej pedagogëve që e kishin kërkuar, ndërsa kritikoi mënyrën për shprehjen e shqetësimeve. Kryeministri u shpreh se reforma në arsimin e lartë nuk do të ndalet dhe se sot universiteti ka një autonomi të zgjeruar.
Sa i takon vonesës së pagave, Rama ka pranuar se është krijuar për shkak të një debati brenda qeverisë.
“Vonesa e pagave është një shembull shumë i qartë i faktit që reforma është sfidë edhe për ne që e kemi udhëhequr. Sepse na ka vonuar ne vetë si qeveri një debat midis Ministrisë së Arsimit dhe Financave për trashëgiminë e grantit të pakushtëzuar”, tha Rama.
Rama tha se qeveria vendosi që grantet të trashëgohen. Duke pranuar që fondet janë të pamjaftueshme, Rama tha se do të ketë rritje të grantit, nëse do të ketë një rritje të performancës në bazë të procesit të akreditimit.
“Granti i pakushtëzuar është i pamjaftueshëm, pra nëse e shohim në volumin e tij shkon në tërësinë e vet për të mbuluar një pjesë të konsiderueshme, po jo plotësisht, të pagave. Atëherë, këtu ka dy gjëra, 1 na takon ne dhe 1 ju takon ju. Ne na takon ta rrisim grantin e pakushtëzuar, po jo pa u bazuar tek merita, por duke u bazuar tek merita tek performanca e universitetit.
Kjo rritje do të vijë progresivisht vit pas vit.
Ana tjetër është rrogat. Ne morëm një vendim për rritjen e rrogave. Është hera e fundit që qeveria vendos për rrogat, por i takon çdo universiteti. Është punë e universitetit në varësi të performancës, në varësi të kontributeve”, tha Rama.
Sa i takon debateve të brendshme, Rama tha se ato duhet të zgjidhen nga vetë universiteti.
“Nuk e kuptoj kujt ia kërkoni zgjidhjen për probleme të brendshme. Të ndërhyjë qeveria? Nuk ndërhyn kurrë, kjo është autonomia juaj”, shtoi kryeministri.
Kryeministri theksoi gjithashtu se është në dorë vetëm të universitetit të vendosë tarifat dhe të administrojë buxhetin. Ai theksoi se është thelbësore të adresohen në testimin e radhës çështjet e ngritura gjatë akreditimit.
Ndërkohë pas takimit ka ardhur edhe reagimi i kryedemokratit Lulzim Basha përmes një statusi në rrjetin social Facebook. Kreu i opozitës ka dënuar idenë e kryeministrit se universiteti duhet të bëjë para, pasi shkollimi nuk është mall si çdo mall tjetër dhe universitetet nuk janë firma ndërtimi.
“Ka vetëm një zgjidhje për arsimin e lartë: autonomi e plotë akademike, financiare dhe administrative. Ka vetëm një zgjidhje për arsimin e lartë: universitete jo-fitimprurëse, jashtë kontrollit të qeverisë dhe të pronarëve”, shkruan Basha.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.