Rama takon Mogerinin: Presim hapjen e negociatave, shtojmë rezultatet

Në një takim me kreun e Politikës së Jashtme të Bashkimit Europian, Federica Mogherini, Kryeministri Edi Rama u shpreh se Shqipëria pret rezultat pozitiv për hapjen e negociatave. Në një dalje të përbashkët para mediave, Rama premtoi se në muajt e ardhshëm do të ketë më shumë rezultate nga Shqipëria.

“Faleminderit dhe është një kënaqësi si gjithmonë që të vij t’iu takoj, veçanërisht në këtë moment kur ne shpresojmë në një rezultat pozitiv të të gjithë përpjekjeve të përbashkëta me fillimin e negociatave të anëtarësimit. Jam shumë krenar që kam ardhur këtu me më shumë rezultate të mira dhe jam i sigurt që do të kemi edhe më shumë në muajt e ardhshëm”.

Nga ana e saj, shefja Politikës së Jashtme të BE-së, siguroi kryeministrin për mbështetjen ndaj Shqipërisë në procesin e integrimit dhe vlerësoi reformat e ndërmarra.

“Është një kënaqësi për mua të mirëpres, përsëri, Kryeministrin Rama, në një moment veçanërisht të rëndësishëm për rrugën e Shqipërisë drejt BE-së. Nën lidershipin e tij, Shqipëria ka bërë një punë të jashtëzakonshme, veçanërisht në Reformën e Drejtësisë, luftën kundër drogës dhe korrupsionit, një punë që ne e mbështesim e që duhet të vazhdojë përpara dhe kjo është një punë që mund të hapë rrugën drejt hapave të mëtejshëm të procesit të integrimit në BE. Jam e lumtur që kam përsëri këtë mundësi për të diskutuar së bashku mënyrën se si këto hapa mund të shndërrohen në një opsion të vërtetë në fillim të vitit të ardhshëm”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.