Raporti i energjisë në SHBA / Prodhimi i naftës bruto pritet të bjerë më shpejtë nga sa pritej

Prodhimi i naftës bruto në Shtetet e Bashkuara pritet të bjerë me 290,000 fuçi në ditë në vitin 2021, në një total prej 11.02 milionë fuçi në ditë, sipas Administratës së Informacionit Mbi Energjinë, që është një rënie më e pjerrët se  ç’priste më parë.  Prodhuesit e naftës në SHBA kanë rritur gradualisht aktivitetin e shpimit, ndërkohë që çmimet e naftës janë rimëkëmbur .  Megjithatë, prodhimi ka qenë i ngadaltë, ndërkohë që investitorët i kanë bërë presion kompanive që të frenojnë shpenzimet dhe fokusohen tek kthimet.  Në vitin 2022,  prodhimi pritet të rritet me 820,000 fuçi në ditë, në 11.84 milionë në total,  i pandryshuar nga vlerësimi i muajit të kaluar.  “Ndërkohë që çmimi mesatar i naftës bruto amerikane qëndron sipër 55 dollarë për fuçi në projeksionet tona, ne presim që prodhuesit do të shtojnë aktivitetin e shpimit në muajt e ardhshëm”- deklaroi agjencia.  Sipas raportit, pritet që konsumi i naftës dhe lëndëve të tjera djegëse në SHBA të rritet me 1.39 milionë fuçi në ditë, në një total prej 19.51 milionë në vitin 2021.  Për benzinën, agjencia pret që konsumi në SHBA të arrijë një mesatare prej 9 mln fuçi ën ditë këtë verë, që është 1.2 milionë fuçi në ditë më shumë se verën e kaluar.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.