Raporti i GRECO: Europa duhet të bëjë më shumë për të parandaluar korrupsionin midis deputetëve

Lufta kundër korrupsionit në Europë ka marrë një kthesë pozitive, por ende duhet të bëhet më shumë. Organi i antikorrupsionit i Këshillit të Europës GRECO, thotë në raportin e tij të fundit se ka pasur përmirësime të vogla nga vendet anëtare, në përputhje me rekomandimet e tyre antikorrupsion në vitin 2019.

Por ka dy fusha që mbeten shqetësuese. Së pari, vendet po binin prapa në luftimin e korrupsionit kur bëhet fjalë për deputetët. Përqindja e vendeve që zbatojnë rekomandimet e GRECO-s për të luftuar korrupsionin midis politikanëve ishte rreth 26 përqind. “Kjo është shumë e ulët,” tha Gianluca Esposito, sekretari i përgjithshëm i GRECO.

Rekomandimet për politikanët përfshijnë rregulla për marrjen e dhuratave, donacioneve dhe përfitimeve të tjera. Ato duhet të regjistrohen, thotë GRECO, përfshirë llojin e dhuratës dhe dhuruesin, për të përmirësuar transparencën.

Fusha e dytë e shqetësimit janë sulmet e vazhdueshme ndaj pavarësisë së gjyqësorit në disa shtete anëtare. “Kjo shpjegon, jo justifikon, por shpjegon nivelin e ulët të besimit të popullatës në politikë,” shton Esposito.

Raporti vjen kundër një sfondi të protestave masive në vendet e BE gjatë vitit të kaluar që pretendojnë korrupsion dhe mashtrim, veçanërisht nga Malta, Republika Çeke, Polonia dhe Rumania.

Më shumë para, më shumë probleme

Komisioni Europian ka njoftuar një fond masiv të rimëkëmbjes prej 750 miliardë eurosh, si dhe një buxhet prej 1.1 trilionë eurosh të BE, nga të cilat vendet anëtare do të marrin para.

Raportet kanë paralajmëruar në të kaluarën keqpërdorimin e fondeve të BE-së, kështu që ka shqetësime që kjo ‘tenxhere’ e re mund të jetë e hapur për abuzim.

Një studim nga Parlamenti Europian në vitin 2016 pretendoi se kostot e korrupsionit në vendet e BE-së kanë arritur deri në 990 miliardë euro në vit për sa i përket humbjeve të produktit të brendshëm bruto.

GRECO ka botuar udhëzime për të mbrojtur paratë e BE-së, të cilat përfshijnë kontrolle dhe balanca të përshtatshme, transparencë dhe përgjegjshmëri. Gianluca Esposito argumenton se nëse zbatohen në mënyrë korrekte, këto masa do të parandalojnë që paratë “të shkojnë në duar të gabuara”.

Një tjetër mundësi është krijimi i një liste të zezë të kompanive të BE-së që u dënuan për korrupsion dhe ndalimin e tyre nga tenderët e BE-së për pesë vjet. Ky është sugjerimi nga eurodeputeti hungarez Katalin Cseh.

“Në këto kohë provuese kur çdo cent i vetëm është i nevojshëm për rimëkëmbjen tonë ekonomike dhe për tranzicionin tonë të gjelbër, ne nuk mund t’i lejojmë paratë tona të shkojnë drejt harxhimeve përmes korrupsionit,” thotë Cseh.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.