Raporti i Monte dei Paschi – Rezulton në humbje ndërkohë që nis ndihma shtetërore
Monte dei Paschi di Siena, banka më e vjetër në botë, raportoi një humbje prej 3.1 miliardë euro në tremujorin e dytë. Pas disa bisedimeve me rregullatorët europianë, banka përfundoi një rritje të kapitalit me 8 miliardë euro, për të fuqizuar financat.
Kjo përfshinte një injeksion prej 3.85 miliardë euro nga Shteti italian, duke i dhënë Qeverisë një zotërim fillestar prej 52.2% në huadhënësin e katërt më të madh të vendit.
Për rrjedhojë të rikapitalizimit, raporti i mjaftueshmërisë së kapitalit i bankës, që është një tregues thelbësor mbi fuqinë financiare, qëndron tashmë në 15.4%.
Në fund të muajit Mars, qëndronte në 6.5%, dhe do të arrinte në 1.5% po të mos injektohej paraja.
Përveç parasë shtetërore, pjesa tjetër e kapitalit të ri erdhi nga konvertimi i detyrueshëm i titujve të borxhit në tituj kapitali, përfshirë instrumentet e mbajtura nga kompania më e madhe e sigurimit në Itali, Generali, që është kthyer tashmë në investitorin e dytë më të madh të bankës, me një zotërim prej 4.3%.
Pronësia e Shtetit ka gjasa të rritet në 70% më vonë gjatë vitit, ndërkohë që Qeveria kompenson zotëruesit e titujve të borxhit, duke u marrë aksionet.
Nën kushtet e programit të shpëtimit, huadhënësi po shet 26.1 miliardë euro kredi të këqija, që do të titullohen nëpërmjet një mekanizmi të financuar në mënyrë private, me operacionin që financohet pjesërisht nga fondi i shpëtimit Atlante 2.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.