Raporti i OBSH, Shqiptarët kampionë në ushqimin e shëndetshëm, aktivitetin fizik, përdorimin e celularit dhe numrat e obezitetit
Adoleshentët dhe fëmijët shqiptarët kryejnë një jetesë të shëndetshme, ndoshta jo idealen, por në letër më të mirën në Europë.
Të dhënat e fundit të publikuara nga Organizata Botërore e Shëndetësisë kanë përllogaritur se obeziteti mes të rinjve shqiptarë është më i ulëti në Europë për vajzat, me 1%. Ndërkohë që djemtë performojnë më dobët, duke u renditur në mes të tabelës.
Ky raport tregon se të rinjtë shqiptarë i kanë bërë detyrat e shtëpisë kur vjen puna tek ushqimi, aktiviteti fizik dhe të qëndruarit para celularit.
Në renditjen për konsumin ditor të frutave dhe perimeve, vajzat shqiptare janë të dytat në Europë, ndërsa djemtë të tretët. Vetëm të rinjtë nga Armenia ushqehen më shëndetshëm në këtë aspekt.
Megjithatë, frutat duket se nuk janë mjaftueshëm, pasi adoleshentët shqiptarë renditen mes vendeve të para edhe për konsumin ditor të pijeve me sheqer dhe ëmbëlsirave. Vendet nordike kryesojnë në këtë klasifikim, duke u renditur në katër vendet e para, me më pak se 4% të të rinjve që konsumojnë këto lloje produktesh.
Studiuesit vunë re në këtë rast, një lidhje të drejtpërdrejtë mes gjendjes financiare dhe konsumit të pijeve e ëmbëlsirave, ku fëmijët me prindër më të pasur konsumojnë më tepër sheqerna. Kjo lloj pabarazie është e theksuar sidomos në vendit tonë, Ukrainë dhe Rusi.
Krahas dietës ushqimore, raporti i OBSH merr në konsideratë edhe aktivitetet fizike dhe tendencat e të qëndruarit para televizorit e celularit. Trendi në Europë është në zbritje drastike për kohën e qëndruar para TV, por kjo kohë është duke u kthyer në favor të kompjuterit dhe lojërave kompjuterike.
Edhe në vendin tonë po ndiqet ky trend, megjithëse në ritme më të ngadalta.
Shqipëria performon shumë mirë edhe në kryerjen e aktiviteteve fizike, ku 21,7% e vajzave dhe 34,9% e djemve kryejnë së paku një orë në ditë aktivitet të vrullshëm fizik. Vajzat janë të pestat në këtë renditje, ndërsa djemtë të parët, duke i dhuruar vendit tonë një fitore në “dygarësh”.
Sipas studimit, pabarazia shoqërore në të ardhura ka një ndikim të madh edhe në shkallën e kryerjes së aktiviteteve fizike. Kjo është më e ndjeshme tek vajzat, ku ato nga familje më të pasura kryejnë më tepër vrap, sporte, palestër, etj.
Përdorimi i celularit nga fëmijët 11-15 vjeç është një tjetër tregues ku vendi ynë performon më mirë: vajzat rezultojnë të fundit për orë të qëndruara para ekranit, me vetëm 45,5% të tyre që qëndrojnë më shumë se dy orë në ditë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.