Raporti mbi stabilitetin i Bundesbank – “Çmimet e shtëpive dhe interesat e ulëta kërcënojnë Gjermaninë”

Ekonomia gjermane po përballet me një serë rreziqesh, që variojnë nga çmimet e larta të pronave të paluajtshme e deri te dobësia e institucioneve financiare, megjithatë investitorët mund t’i kenë injoruar këto cënueshmëri prej rritjes së fortë ekonomike të vendit, paralajmëron Bundesbank. Gjermania ka qenë motori i rimëkëmbjes së ekonomive të Europës, dhe disa tregues sugjerojnë për një ekspansion akoma më të gjerë, të mbështetur nga politikat monetare të Bankës Qendrore Europiane.

“Ekziston rreziku që normat e ulëta të interesit dhe kushtet e favorshme ekonomike në Gjermani, të bëjnë që investitorët të nënvlerësojnë rreziqet”, deklaron Banka Qendrore në raportin mbi stabilitetin financiar.

“Rreziqet janë akumuluar gjatë periudhës së tejzgjatur të normave të ulëta të interesit. Vlerësimet e shumë investimeve janë në nivele të larta dhe përqindja e investimeve me norma të ulëta të interesit në bilancet e bankave dhe siguruesve, janë rritur ndjeshëm”, thekson Bundesbank.

Sektori bankar është në formë dhe i aftë për të përballuar rreziqet, por interesat e ulëta kërcënojnë përfitueshmërinë e tyre në afat-gjatë, duke bërë që këto të marrin më shumë rrezik përsipër në këmbim të kthimeve më të larta. Çmimet e pronave rezidenciale janë të mbivlerësuara me 15-30% dhe ndërsa rreziku që vjen nga kreditë për shtëpi është ende i limituar, një përmbysje në çmimet e shtëpive mund të ketë ndikim gjigant në banka, raporton Bundesbank.

Bankat gjermane kanë treguesit mbi përfitueshmërinë dhe efiçencën më të dobët në rajon,  me kthimin nga aktivet (RoA) në nivelet më të ulëta në rajon dhe raportin e kostove ndaj të ardhurave në 74.9%, që është niveli më i lartë në Eurozonë.  Sipas raportit të Bundesbank, niveli i ulët i përfitueshmërisë mund të japë shtysë në pranimin e rreziqeve më të mëdha për të gjeneruar kthime të kënaqshme.

Një periudhë e tejzgjatur e normave të ulëta të interesit do të vazhdojë të vë nën presion bankat e vogla e të mesme si dhe siguruesit e jetës në veçanti.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.