Raporti/ Qytetet më të vizituara në botë, ku turistët shpenzojnë më shumë para “cash”. Ku shpenzohet më shumë për “shopping” dhe akomodim
Dubai është dukshëm një nga qytetet për shpenzimet më të larta në radhët e vizitorëve. Sipas një raporti, vitin e kaluar 14.9 milionë vizitorë shpenzuan në këtë qytet 28.5 miliardë USD.
Nga ana tjetër New York-u dhe Londra janë “magnet” për blerësit, megjithatë dy qytetet mbeten sërish larg Dubait, kur llogariten shpenzimet e vizitorëve.
Ndërsa, Bangkoku është destinacioni më i popullarizuar në përgjithësi – me 19.4 milionë vizitorë vitin e kaluar, por shpenzimet e vizitorëve janë nën gjysmën e asaj që ishte shpenzuar në Dubai, raporton SCAN.
Pothuajse 90% e vizitorëve në Dubai udhëtuan atje gjatë kohës së lirë dhe jo kur ishin me punë apo ndërsa ushtronin biznesin e tyre. Duket se një pjesë e rëndësishme e kohës së lirë është shpenzuar për blerje.
Vizitorët në Dubai shpenzuan 31% të shpenzimeve të tyre për “shopping”, madje edhe më shumë se sa ishte shpenzuar në akomodim, të cilat përbënin 29% të totalit.
Ndryshe është çështja me Parisin, ku vizitorët shpenzuan 45% të buxhetit të tyre në akomodim dhe vetëm 16.6% për blerje. Në New York vizitorët shpenzuan 31.8% në akomodim dhe 21.4% për shopping. Dubai ofron mundësi për turistët. Qyteti ka 70 qendra tregtare për blerjen e suvenireve apo produkteve të tjera.
Që nga viti 2009, PBB-ja reale në botë, e matur nga “World Economic Outlook”, është rritur me 21.8% në terma reale.
Por numri i përgjithshëm i vizitorëve brenda natës u rrit me 55.2% dhe shpenzimet e tyre u rritën me 41.1%, për të njëjtën periudhë.
Ndër pikat e nxehta për udhëtime, Osaka në Japoni është destinacioni më i shpejtë në rritje në botë. Bukureshti është destinacioni me rritje më të shpejtë në Evropë dhe Miami pozicionohet në Amerikën e Veriut.
Ndër qytetet kryesore të 10 destinacioneve në botë, parashikohet që vetëm New York-u të ketë një rënie të vogël, në numrin e vizitorëve në vitin 2017.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.