“Raportimet për azilkërkuesit dhe akuzat për krime në Europë”- Rama: Shqiptarët po përdoren për propagandë. Asnjë shans për azil në BE
Gjatë fjalës së tij, Kryeministri Rama i ka konsideruar të qëllimshme përpjekjet mediatike apo politike të disa vendeve të BE për kriminalitetin shqiptar, duke theksuar se kriminelët nuk kanë flamuj dhe se në Europë ata i përkasin të gjitha pasaportave të mundshme. Kreu i qeverisë ka qenë i prerë në këtë konferencë, duke i konsideruar deklaratat si të papranueshme dhe se propagandimi i etnisë nuk ka lidhje me Europën që duam.
“Holanda është një mbretëri, është një shtet. Nuk kemi problem ne as me Holandën as me ndonjë shtet tjetër. Unë flas për mënyrën se si në media dhe zërat që kanë axhendat e tyre në BE targetojnë të ardhurit nga vendet e tjera, targetohen edhe shqiptarët.
Në momentin që një vend a një tjetër lidhet me kriminalitetin për mua kjo është e papranueshme. Nëse ka kriminelë në Europë ata kanë të gjitha pasaportat e mundshme dhe shtetet duhet t’i dërgojnë para drejtësisë, propagandimi i etnisë nuk ka lidhje me Europën që duam, ka lidhje me një Europë që kalon një periudhë turbullire. Ne po bëjmë pjesën tonë e nuk pranojmë të propagandohemi si kriminelë. Azili nuk është opsion. Refuzoj me forcë çdo përpjekje mediatike, politike të vendeve në BE, për të treguar një krim shqiptar apo ballkanik. Ne kemi për borxh të merremi me kriminelët në Shqipëri, ata të merren me kriminelët në vendet e tyre dhe të mos na shqetësojnë me këto ndarje.
Në realitetin e gjërave ka një problem shqetësues që lidhet me faktin që qytetarët e këtij rajoni dhe ata të Shqipërisë nuk kanë asnjë shans të marrin azil politik në Evropë. Është thjesht rënie në rrjetën kriminale të njerëzve që kërkojnë një jetë më të mirë”, tha Rama.
Nga ana e tij, Komisioneri Hahn pohoi se shumë vende janë prekur nga azikkërkuesit, por këto vende i njohin përpjekjet e Shqipërisë dhe masat e qeverisë. Ai nuk foli për një datë konkrete për anëtarësimin e Shqipërisë në BE, por pohoi që të ketë një rekomandim pozitiv për Shqipërinë kërkohet zgjuarsi politike:
“Duhet të merrni mbështetjen e vendeve anëtare për të bërë hapin e radhës. Kërkoj mirëkuptimin tuaj për të mos iu dhënë një datë fikse, por do përpiqemi ta çojmë përpara Shqipërinë dhe këtë e kemi bërë gjithë këto vite”, tha Hahn.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.