Raste të taksimit të dyfishtë – Shqipëria ka marrëveshje me 41 shtete

Marrëveshjet e shmangies së tatimit të dyfishtë krijojnë një bazë të plotë ligjore për trajtimin tatimor të individëve. Këta mund të jenë personave juridikë shqiptarë apo të shtetit përkatës ku ekzistojnë aktivitete biznesi apo të ardhura të ndryshme.

Aktualisht marrëveshje për eliminimin e taksimit të dyfishtë janë ratifikuar me mbi 41 shtete. Edhe pse me shumë vende nuk kemi shkëmbime tregtare apo dhe biznese qartësisht të regjistruara, përsëri shteti shqiptar ratifikon marrëveshje te këtij lloji me to.

Por për të aplikuar për shmangien e taksimit të dyfishtë kërkesën personat përfitues duhet ta depozitojnë në Drejtorinë e Përgjithshme të Tatimeve, Drejtoria e Marrëdhënieve dhe Koordinimit Ndërinstitucional të plotësojnë dhe dorëzojnë certifikatën e rezidentit tatimor. Po cilët janë disa raste nga praktika që përfitojnë ose jo:

1-Taksimi i të ardhurave pasive me burim në Shqipëri të përfituara nga jorezidentët.

Nëse je i huaj por përfiton të ardhura pasive me burim nga Republika e Shqipërisë (të ardhura nga dividentët, interesat, honoraret) do të paguani tatimin në Republikën e Shqipërisë.

2-I huaj që punon në Shqipëri

Në qoftë se je i huaj që punon në Shqipëri, i rëndësishëm është afati i qëndrimit, nëse ky është i përkohshëm, apo i vazhdueshëm. Nëse është i përkohshëm dhe qëndron më pak 183 ditë brenda një viti, do të jeni jo rezident për qëllime tatimore në Shqipëri. Nëse qëndroni më shumë se 183 ditë brenda një viti do të jeni rezident për qëllime tatimore në Shqipëri.

3-I huaj që studion në Shqipëri

Nëse jeni student apo ndiqni kurse trajnimi apo kualifikimi në Shqipëri, të ardhurat tuaja nuk do jenë të tatueshme në Shqipëri nëse ato janë me burim jashtë territorit të Republikës së Shqipërisë.

4-I huaj që zotëron pasuri të paluajtshme në Shqipëri

Nëse je i huaj dhe zotëron pasuri të paluajtshme në Shqipëri të ardhurat që rrjedhin nga kjo pasuri, nga përdorimi direkt, dhënia me qira, ose çdo forme tjetër përdorimi i pasurive të paluajtshme do të tatohen në Shqipëri.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.