Ratifikimi i marrëveshjes mes Shqipërisë dhe Mbretërisë së Bashkuar – Rinovohet juridiksioni në fushën e ripranimeve

Këshilli i Ministrave ka vendosur ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Mbretërisë së Bashkuar të Britanisë së Madhe dhe Irlandës së Veriut.

Ky projektligj ka për qëllim ratifikimin e marrëveshjes, për ripranimin e personave dhe protokollit zbatues të marrëveshjes.

Marrëveshja është propozuar nga qeveria britanike në kuadër të daljes se saj nga Bashkimi Evropian. Një marrëveshje e tille dypalëshe ekziston që nga viti 2003, por zhvillimet ndërkombëtare dhe dinamika migratore në shkalle globale kanë bërë të nevojshëm rinovimin e këtij instrumenti juridik në fushën e ripranimeve.

Kjo marrëveshje është hartuar duke u bazuar në “modelin komunitar”, në frymën e respektimit të marrëveshjeve ndërkombëtare, në pajtim me legjislacionin kombëtar të të dyja shteteve, pa paragjykuar angazhimet e tyre të mëparshme, bazuar në marrëveshjet dypalëshe, shumëpalëshe me vendet e treta, duke respektuar parimet dhe rregullat e shkëmbimit të informacionit mbi të dhënat personale.

Palët midis tyre janë të vendosura për ngritjen e një kuadri të përbashkët ligjor operacional mbi çështjet e lartpërmendura, në përputhje me kërkesat dhe normat e së drejtës ndërkombëtare dhe Organizatës së Kombeve të Bashkuara.

Ky ligj hyn në fuqi 15 ditë pas botimit në “Fletoren zyrtare”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.