Raundi i dytë në Francë – Pritet fitorja dërrmuese e partisë së Emmanuel Macron
Francezët u janë drejtuar kutive të votimit në raundin e dytë të zgjedhjeve parlamentare këtë të dielë, që pritet t’i japin partisë së Presidentit Emmanuel Macron mazhorancën dërrmuese, gjë që do t’i japë mundësinë për të ndërmarrë reformat sociale dhe ekonomike.
Votimi vjen 1 muaj pasi ish-bankieri 39 vjeçar u bë lideri më i ri në historinë moderne të vendit, duke premtuar rimëkëmbjen e ekonomisë së dytë më të madhe të eurozonës. Partia “En Marche” e Emmanuel Macron ka më pak se 1 vit që është krijuar, e megjithatë sondazhet projektojnë se do të fitojë 75-80% të vendeve në Parlament. Shumë prej ligjbërësve të Macron do të jenë fillestarë, gjë që do të ndryshojë parlamentin në kurriz të konservatorëve dhe socialistëve që kanë qeverisur Francën prej dekadash.
Një nga sfidat e Macron, ndërkohë që riorganizon rregullat e punës dhe investon miliarda të parasë publike në fusha si trajnimi profesional dhe energjia e rinovueshme, do të jetë ruajtja e një grupi të tillë të ligjbërësve.
Rivalët e Macron i kanë bërë thirrje francezëve që të votojnë, duke paralajmëruar se pushteti do të përqendrohet në duart e një partie të vetme. Votimi ka gjasa të sjellë një disfatë për partitë e vjetra. Republikanët ka gjasa të jenë grupi më i madh opozitar në Parlament.
Megjithatë, sondazhet tregojnë se ata nuk do të fitojnë më shumë se 90-95 vende nga 577. Partia Socialiste, që ka qeverisur Francën deri në muajin e kaluar, do të përballet me një humbje turpëruese, ndërsa sondazhet projektojnë se ata nuk do të marrin më shumë se 35 vende.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.