Reagimet për dhunën në protestë – Institucione shqiptare e të huaja, mesazhe për distancim nga aktet e dhunshme
Krerët e institucioneve shqiptare por edhe atyre të huaja në vendin tonë, kanë reaguar duke dënuar dhunën e ushtruar gjatë protestës së opozitës. Përmes mesazheve të tyre në rrjetet sociale, ata kërkojnë distancim të palëve dhe vetëpërmbajtje.
Nuk kanë munguar reagimet si nga politika shqiptare por edhe nga ndërkombëtarët për të ndalur aktet e dhunës gjatë protestës së zhvilluar. Presidenti i Republikës, Ilir Meta iu ka bërë thirrje palëve për qetësi pas tensioneve në protestën e thirrur nga opozita. Në një mesazh të Presidencës thuhet se Kreu i Shtetit po ndjek me shqetësim situatën dhe kërkon të evitohet dhuna dhe konfrontimet.
Po ashtu edhe kryeministri Edi Rama në reagimet e njëpasnjëshme në rrjetin social twitter, ka kërkuar distancim nga dhuna duke duke nënvizuar se ajo nuk dëmton qeverinë por vendin. Rama i uron shërim të shpejtë për policët e plagosur dhe ndëshkim për dhunuesit e tyre e për zjarrvënësit e institucioneve. Nga ana tjetër, Ministri i Brendshëm Sandër Lleshaj ka kërkuar vazhdimisht distancim nga dhunimi i institucioneve edhe forcave të policisë “Me Molotov nuk ndërtohet demokracia, por synohet të shkatërrohet Shqipëria. Por kjo gjë është e pamundur! Ftoj qytetarët e përgjegjshëm të distancohen nga sulmi ndaj institucioneve. Askush nuk mund ta djegë Shqipërinë përsëri!” përfundon Lleshaj .
Ashpër ka reaguar edhe ambasada Amerikane në Tiranë ku përmes një mesazhi shprehet se “Objektivi i deklaruar i opozitës për ta bërë demokracinë e Shqipërisë më të fortë shkon kundër dhunës që është duke u ushtruar nga protestuesit. Dhuna është thelbësisht jodemokratike dhe duhet të ndalojë. Drejtuesit e protestës kanë përgjegjësinë të nxisin qetësi. Iu bëjmë thirrje të gjitha palëve që të tregojnë vetëpërmbajtje”.përfundon reagimin e saj ambasada e SHBA-ve .Thirrje për evitimin e tensioneve dhe dhunës vijnë edhe nga prezenca e OSBE në Tiranë “Prezenca e OSBE-së e ka ndjekur protestën e sotme minutë pas minute. Ne përsërisim qëndrimin tonë të palëkundur që dhuna nuk është përgjigja. Gjithashtu, reagimi i rëndë ndaj dhunës nuk ndihmon”, deklaron OSBE.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.