Reagojnë liderët botërorë/ Përgëzojnë Biden. Shpresojnë për rikthimin e marrëdhënieve me SHBA
Liderët botërorë kanë përgëzuar fitoren e Joe Biden dhe shumë prej tyre shpresojnë që presidenti i zgjedhur demokrat, të rikrijojë marrëdhëniet, duke u përqendruar përsëri në çështje si klima dhe pandemia. Në 4 vite si president, Donald Trump ka përmbysur dekada të politikave të huaja amerikane, ka kritikuar aleatët në Europë dhe është tërhequr nga marrëveshjet ndërkombëtare. Biden ka premtuar një qasje më bashkëpunuese. Kancelarja gjermane, Angela Merkel, bëri të ditur se kërkon të bashkëpunojë me Biden. “Miqësia jonë përtej atlantikut është e domosdoshme nëse përballemi me sfidat më të mëdha të kohërave”- shkroi ajo në Twitter.
Ndërkohë, Ministri i jashtëm Heiko Maas bëri thirrje për një nisje të re të marrëdhënies trans-atlantike. Kina pritet të përballet me një qasje më të ashpër nga SHBA, nën Biden, për çështje si të drejtat e njeriut dhe për ligjet në Hong Kong. Kryeredaktori i të përditshmes së partisë komuniste, Hu Xijin, tha se Kina duhet të komunikojë me ekipin e Biden për të zhbërë trazirat ekstreme në marrëdhënien mes 2 vendeve.
Nga Rusia nuk ka patur reagim të menjëhershme, ndërkohë që 4 vite më parë, Presidenti Vladimir Putin përgëzoi Trump pak orë pasi televizionet publikuan rezultatin. Kryeministri Britanik , Boris Johnson, përmendi prioritete të përbashkëta, përfshirë klimën, tregtinë dhe sigurinë, duke përgëzuar Biden. Ai mirëpriti gjithashtu zgjedhjen e Kamala Harris si gruan e parë në rolin e zv.presidentes. Reagime ka patur edhe nga Lindja e Mesme, ndërkohë që presidenti i Iranit, hassan Rohani, i bëri thirrje Biden që të ndryshojë marrëdhëniet, pas politikave të presionit maksimal nga Trump. “Ka ardhur një mundësi për qeverinë e ardhshme të Shteteve të Bashkuara që të kompensojë gabimet e mëparshme dhe të respektojë normat botërore”- tha Rouhani.
Presidenti francez, Emmanuel Macron, bëri thirrje për adminsitratën e ardhshme ameriknae që të bashkëpunojë, pasi ka shumë sfida për të tejkaluar.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.