Reagojnë Rama e Veliaj – “Teatri i ri Kombëtar do të ndërtohet”
Kryeministri, Edi Rama, dhe kryetari i Bashkisë së Tiranës, Erion Veliaj, kanë reaguar ndaj protestës së artistëve kundër prishjes së Teatrit Kombëtar. Rama i ka cilësuar minorancë të gjithë artistët, politikanët dhe protestuesit që hynë brenda ambienteve të Teatrit Kombëtar.
“Asnjë minorancë nuk mund të marrë peng asgjë e askënd në këtë vend. Me gjithë respektin për një minorancë aktorësh teatri dhe politikanësh që s’kanë hyrë kurrë në teatër, po janë mësuar të bëjnë teatër me çdo gjë, Teatri i ri Kombëtar do të ndërtohet si plan e përgjegjësi qeverisëse”, shkruan Rama në Twitter.
Më tej, kryeministri shprehet se “Teatrin e ri Kombëtar e kërkon kryeqyteti, vendi, kombi e shumica e komunitetit të artistëve të skenës”. “Njësoj si Stadiumi i Ri kombëtar, ai do të jetë një gur kilometrik në rrugën e Shqipërisë që duam. Kush s’është dakord është i respektuar, po s’ka as mandat as të drejtë të pengojë”, përfundon kryeministri.
Në lidhje me situatën e krijuar në Teatrin Kombëtar, ka reaguar edhe kryebashkiaku Erion Veliaj, i cili ironizon duke thënë se një lajm i mirë ishte fakti që Basha shkoi në atë teatër. “Lajm i mirë që pas kaq vitesh teatër në politikë, Lulzim Basha shkon për herë të parë në Teatër – dhe s’besoj tallashi i ngjan ndonjë teatri në Holande! Por si tek Lodrat, Pazari, Bulevardi e Sheshi, Tirana do fitojë sërish!”,shkruan Veliaj.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.