Recesioni nuk ndalet në Finlandë, ndërkohë që fqinjët “shkëlqejnë”
Finlanda është futur në një krizë që duket se nuk ka fund. Pas tre vitesh të gjata në recesion, vendi vazhdon të prodhojë shifra negative, në thuajse çdo sektor.
Prodhimi është në stanjacion, ndërkohë që papunësia vijon të rritet, në 9.4%. Fqinjët suedez ndërkohë raportojnë një nivel minimal historik, në 4.1%. Kosto e prodhimit rritet, ndërkohë që besimi konsumator po bie me ritme të frikshme.
Finlanda është i vetmi vend nordik pjesë e Eurozonës. Pavarësisht se rreth një vit më parë në krye të qeverisë u vendos një biznesmen i suksesshëm vendas, ekonomia ka marrë për poshtë dhe nuk di të ndalet më.
Finlanda sot i ngjason më shumë Italisë, për të mos thënë Greqisë. Papunësia në 9.4% në një vend me një popullsi jo më të madhe se 5 milionë e gjysëm banorë, është një dhimbje koke për qeverinë dhe ekonominë e vendit.
Papunësia e lartë merr shkas kryesisht nga kriza në sektorin e prodhimit tradicional. Kolapsi i Nokias i ka dhënë një goditje të rëndë sektorit dhe punësimit në vend.
Disiplina e bilancit, rrjedhojë e angazhimit për të qenë pjesë e Eurozonës nga ana tjetër, duket se është një pengesë e madhe për Helsinkin, duke e bërë të qëndrojë mbrapa fqinjëve.
Jo verën Suedia, që është edhe superfuqia rajonale, por edhe Norvegjia apo Danimarka, prodhojnë, dhe jo vetëm shifra, por edhe produkte dhe shërbime që zënë vend mjaft të rëndësishëm në tregjet globale.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.