Reduktimi i aksidenteve rrugore/ Firmoset Deklarata e Stokholmit, në 10 vite ulje e fataliteteve me 50%

Shqipëria ka nënshkruar Deklaratën e Stokholmit, duke marrë angazhimin për zbatimin e planit të masave, për të rritur investimet në infrastrukturë dhe zbatimin e metodave inovative të evidentuara në praktikat më të mira ndërkombëtare, me qëllim përmirësim e sigurisë rrugore, parandalimin e aksidenteve dhe reduktimin e numrit të fataliteteve si pasoje e tyre.

Deklarata është një plan veprimi prej 18 pikash, për të reduktuar me 50% fatalitetet dhe dëmtimet nga aksidentet rrugore, gjatë dekadës së ardhshme, ndërsa u prezantua gjatë Ministerialit të Stokholmit, ku mori pjesë dhe ministrja e Infrastrukturës dhe Energjisë, Belinda Balluku.

Gjatë punimeve të conferences, Balluku ka zhvilluar një takim me përfaqësues të Bankës Botërore, me të cilët ka diskutuar dhe detajuar projektin ambicioz të Qendrës së Monitorimit të Trafiku, por dhe projekte të tjera, të cilat do të ndikojnë në përmirësimin e kushteve të sigurisë rrugore.

Më herët ministrja ka deklaruar se kjo qendër do të ngrihet brenda vitit 2020, ndërsa në funksion të saj do të realizohet edhe mbulimi i gjithë aksesve rrugore me kamera dhe  sinjalistikë elektronike për kalimin e shpejtësisë.

Sipas shifrave të ministrisë, në 6 vitet e fundit numri i aksidenteve rrugore është ulur me 22%, ndërsa numri i viktimave në 10 vitet e fundit është ulur me 36%.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.