Reforma financiare e Trump – Kërkon ndarjen e bankingut të investimeve nga ai tregtar

Presidenti i Shteteve të Bashkuara ka pritur Komunitetin e Pavarur të Bankierëve të Amerikës (ICBA) në Shtëpinë e Bardhë, duke premtuar rishikimin e rregullores bankare të quajtur Dodd Frank.

Donad Trump tha përballë përfaqësuesve të 5.000 kompanive financiare të vogla e të mesme, të njohura si “bankat e komunitetit”, se do të heqë barrën financiare që përkeqëson aktivitetin e tyre.

“Kam urdhëruar administratën për të ofruar lehtësime në mënyrë që këto rregulla të mos dëmtojnë bankat e komunitetit e të mos i vendosin në disavantash përballë institucioneve më të mëdha”, tha Presidenti i Shteteve të Bashkuara duke iu referuar reformës financiare të miratuar nga Administrata Obama pas krizës financiare.

Trump tha ditën e Hënë për Bloomberg se po konsideron ristrukturimin e bankave të mëdha në Wall Street. Presidenti synon të risjellë ligjin Glass Steagall të prezantuar gjatë Depresionit të Madh, që ndan bankingun tregtar nga ai i investimeve.

Ligji Glass Steagall ndante bankingun në dy kategori: institucione të mbështetura nga taksapaguesit që pranojnë depozita dhe japin hua drejt bizneseve dhe konsumatorëve, dhe bankat e investimeve që tregtojnë dhe nënshkruajnë letra me vlerë dhe instrumente të tjera komplekse.

Kjo u hoq në vitin 99 në një derregullim financiar të firmosur nga Presidenti Bill Clinton. Shumë ligjbërës e fajësojë heqjen e Glass Steagall për krizën financiare të vitit 2008, një argument që Wall Street e refuzon ashpër.

Megjithatë, Trump nuk mund ta risjellë i vetëm këtë ligj, pasi do të kërkonte veprim nga Kongresi.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.