Reforma në administratë – BE financon trajnimet që Shqipëria të plotësojë 1 nga prioritetet e integrimit
Reforma në administratën publike është një nga pesë prioritetet për anëtarësimin e vendit në BE. Në këtë kuadër Bashkimi Europian ka financuar trajnimin e 15 punonjësve civil të cilët do të marrin eksperiencën e administratës europiane për ta implementuar më pas në atë shqiptare.
Sipas ambasadores Romana Vlahutin, BE ka standarde të cilat duhet të ndiqen nga vendet që aspirojnë integrimin në familjen europiane. Një prej këtyre standardeve është ofrimi i shërbimeve publike për qytetarët në një nivel të kualifikuar.
“Do të ktheheni me mjaft njohuri që të investoni në vendin tuaj dhe shpresoj që po i afrohet një momenti të rëndësishëm në rrugëtimin e tij drejt Bashkimit Europian. Jo se nuk jeni në Europë, por Bashkimi Europian është një familje kombesh që ka standarde dhe prandaj po përpiqemi fort të investojmë në rritjen e standardeve, njohjen dhe zbatimin e tyre”, tha Vlahutin.
Zëvendës Kryeministrja Senida Mesi, e pranishme në këtë aktivitet, u ndal në rëndësinë që po i kushtohet reformimit të administratës.
“Sigurisht, mendojmë që këto dy programe janë shumë të rëndësishëm nëse flasim se sa i rëndësishëm është në vetvete një nga pesë prioritetet e Shqipërisë për integrimin europian, që është dhe reforma në administratën publike. Sigurisht, nëse ne mendojmë se duam të shkojmë drejt Europës, nëse duam të përmirësojmë shërbimet publike, nëse duam të jemi aty në qendër të punës, duke u ofruar shërbime dhe qytetarëve dhe sipërmarrësve, kush më mirë se administrata publike dhe nëpunësi civil do e ofrojë këtë shërbim. Dhe besoj se këto dy skema janë ato që incentivojnë, nxisin dhe ndihmojnë administratën publike për të ecur para”, tha Mesi.
Projekti “Skemat e Bursave për Nëpunësit e Rinj Civilë” mbështet reformën në shërbimin civil në ngritjen e një sistemi profesional, të pavarur dhe të bazuar në meritë, në përputhje me standardet evropiane, si dhe rritjen e atraktivitetit të shërbimit civil për profesionistët e rinj. Projekti filloi në 11 shtator 2017 dhe është planifikuar të zgjasë 10 muaj. 5 kandidatë e zgjedhur do të trajnohen në një periudhë 4 mujore në Francë, Luksemburg dhe Bruksel. Të gjithë përfituesit e kësaj bure kanë nënshkruar një kontratë 2 vjeçare sipas të cilës do të jenë të detyruar që në fund të trajnimit të rikthehen në vendet e tyre të punës dhe ët ofrojnë shërbimet për qytetarët shqiptarë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.