Reforma në administratë – Kostot për periudhën 2018-2020 janë 1.72 mld lekë
Një nga pesë prioritetet për integrimin e vendit në BE , është edhe reforma në administratën publike. Në këtë kuadër janë miratuar kostot për planin e ri të aktiviteteve për periudhën 2018-2020.
Përcaktimi i kostos është bërë nëpërmjet procesit të vlerësimit të kostos potenciale të nevojshme nga secili institucion, i cili ka përgjegjësinë kryesore në realizimin e aktiviteteve të parashikuara, si dhe bazuar në vlerësimet aktuale të realizuara në kuadër të projekteve të ndryshme që po financojnë një sërë reformash në administratën publike. Këto kosto janë përllogaritur në vlerën 1.72 miliardë lekë.
Në kostimin e strategjisë nuk është përfshirë kostoja administrative (pagesa e nëpunësve, të cilët i kryejnë aktivitetet e tyre për shkak të detyrave të tyre funksionale), si dhe nuk janë kostuar 7 aktivitetet, të cilat lidhen me procedurat e thjeshtuara për ofrimin e shërbimeve dhe zhvillimin e infrastrukturës TIK, për arsye se kjo varet nga proceset që paraprijnë këto aktivitete.
Peshën specifike më të madhe e zënë shpenzimet për zbatimin e aktiviteteve në fushën e organizimit dhe funksionimit të administratës publike, të cilat janë investime në fushën kryesisht të inovacionit.
Krahasuar me planin e kaluar 2015–2017, shpenzimet e trajnimit kanë pësuar një rritje në peshë specifike, nga rreth 4% në rreth 11% në planin e ri. Kjo rritje e peshës specifike vjen si rezultat i zbatimit të programit të shkëmbimit të eksperiencës së punonjësve të rinj të administratës publike, i cili financohet në masën 1 milion euro.
Pjesa më e madhe e fondeve do të shpenzohen gjatë vitit 2018, dhe kjo lidhet me ecurinë e përfundimit të sistemit të Planifikimit të Integruar Informativ (IPSIS) dhe sistemeve të shërbimeve online të financuara nga projekti STAR 2 dhe Trust Fund i Bankës Botërore për sistemin IPSIS. Vlera që do të shpenzohet gjatë vitit 2018 është 906 milionë lekë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.