Reforma në drejtësi, Rama: Gjykatat, vendime jo të drejta për biznesin
Reforma në drejtësi do të ndikojë pozitivisht në zhvillimin ekonomik të vendit dhe të bërit biznes në Shqipëri. Gjatë një takimi më sipërmarrjen Kryeministri, Edi Rama, ka theksuar më tone të forta korrupsionin në sistemin e drejtësisë në vend dhe kryesisht Gjykatën Administrative, që sipas tij, ka dhënë vendime jo të drejta për biznesin.
“Vendimi i gjykatave për pronat i ka shkaktuar dëm ekonomik shtetit. Ka shumë raste ku gjykatat kanë marrë vendime absurde. Këto vendime kanë bërë skeptikë investitorët, dhe janë bërë pengesë për rritjen ekonomike. Problemet e sistemit bankar vijnë nga gjykata. Reforma në drejtësi – vettingu hap themelor për më shumë investime, punësim dhe të ardhura për familjet”.
Kryetari i Dhomës së Tregtisë së Tiranës, Nikolin Jaka, vlerësoi këtë nismë si sinjali më pozitiv i politikës shqiptare, por si një element që do të ndikojë edhe në zhvillimin e biznesit të pastër në vend.
Reforma në Drejtësi prej muajsh është kthyer në “mollë sherri” për klasën politike në vend. Aktualisht zbatimi i saj është i bllokuar, edhe pse u miratua me konsensus të plotë në korrikun e vitit të shkoi.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.