Reforma në inspektime – Hajdari: 85% e inspektimeve bëhen online

Sjellja abuzive nga inspektorë të ndryshëm  gjatë kontrolleve ka qenë dhe problematika e  trashëguar, sipas  biznesit. Kjo sipas tyre,  kryesisht për kohëzgjatjen e  kontrolleve,  kërkesa të ndryshme  të dokumentacioneve, si  dhe në jo pak raste mungesë profesionalizmi. Kreu i Inspektorit Qendror, Shkëlqim Hajdari, u shpreh në një intervistë  për  TV SCAN, se   me reformën që po realizohet tashmë në inspektorate rreth 85 % e gjithë procedurave të kontrolleve në biznese  kryhen online nga trupat e inspektimit.

“Sipas të dhënave që kemi ne nëpërmjet sistemi digjital që administrojmë, mbi 85 për qind e inspektimeve që bëhen, bëhen online. Ky është një sukses shumë i madh. Ka problem sistemi digjital, përditë dalin problem ndërmjet inxhinierëve të inspektorateve, inxhinierëve tonë të firmës që administron, por e rëndësishme është që tashmë kryeinspektorët dhe trupat e inspektimit e kanë kuptuar që inspektimi online me dokumenta standarde dhe duke u arë biznesi si mjet që nëpërmjet inspektimit ta standardizosh, ta formalizosh dhe jo ta penalizosh është një rrugë pa kthim.”

Reforma e nisur në inspektorate  krahas uljes së numrit të Inspektorateve dhe përqendrimin e tyre në  atë Qendror,  synon që të ulë abuzivizmin dhe  korrupsionin. Gjithashtu  për  krijimin e kushteve  lehtësuese për sipërmarrjen  gjatë proceseve të  kontrollit inspektimet tashmë  do të jenë të koordinuara.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.