Reforma në shërbimin veterinar – Peleshi: Çdo njësi administrative do të ketë veterinerin e vet
Çdo njësi administrative në vend do të ketë të paktën një veteriner që do të mbulojë zonën dhe problemet që mund të hasen. Deklarata ka ardhur nga ministri i Bujqësisë dhe Zhvillimit Rural, Niko Peleshi gjatë turit të llogaridhënies nga fshati Shëngjergj.
Sipas tij, reforma e ndërmarrë në shërbimin veterinar është një domosdoshmëri për të zgjidhur mbivendosjen e veterinerëve në institucione të ndryshme.
Ndërkohë, shtoi se caktimi i një veterineri për çdo njësi administrative jo vetëm që do të ndikojë në mbarëvajtjen e proceseve të tilla si matrikullimi apo bërja vaksinave, por do të ketë një impakt edhe në punësim.
“Reforma ka dhe një element tjetër. Do ta dyfishojë a më shumë numrin e veterinerëve. Dhe do të synojmë, do të bëhet fakt, çdo njësi administrative do të ketë veterinerin e vet. Të paktën një veteriner, që çdokush do ta dijë se kush e mbulon, kush është veterineri përkatës. Në qofte se ndodh një problem: nuk ka matrikullim, nuk janë bërë vaksinat, për çdo dështim në këtë fushë dihet që përgjegjësinë e ka veterineri i zonës. Kemi mbi 300 njësi administrative në gjithë Shqipërinë, kështu që na duhet të dyfishojmë, madje dhe më shumë se dyfishojmë numrin e veterinerëve”, tha ministri.
Ndërkohë, shtoi më tej se përmes reformës tashmë i gjithë kontrolli do t’i kalojë Autoritetit Kombëtar të Ushqimit, i cili do të bëjë të gjitha inspektimet e nevojshme. Kjo sipas tij, nuk do të lejojë më bashkitë që të merren me shërbimin veterinar, duke ia lënë këtë kompetencë drejtorisë së re të shërbimit veterinar.
“Bashkia nuk do të merret më me shërbimin veterinar. Pra nuk do të ketë më veterinerë të bashkisë, dhe drejtoria e re e shërbimit veterinar do të merret me shëndetin e kafshëve”, u shpreh Peleshi.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.